أقنعت المتهم الثانى بأنها سرقتني علشان يساعدني على قتلها..اعترافات قاتلة ضحية "غدر الصحاب" بالبحيرة
نواصل نشر نص اعترافات نورهان جميل قتايه، المتهمة وآخرين، بقتل صديقتها نجلاء نعمه الله بدوي، سكرتيرة طبيب العيون، التي لقيت مصرعها في 3 أغسطس الجاري داخل العيادة التي تعمل بها بمول سفير التجاري بمدينة كفر الدوار بمحافظة البحيرة، وحدد رئيس محكمة استئناف الإسكندرية جلسة 6 أكتوبر المقبل أولي محاكمات المتهمين الثلاثة.
س: ما علاقتك بالمتوفاة إلي رحمة مولاها نجلاء نعمة الله سعيد وهل من خلافات؟
ج: هي صاحبتي من أربع سنين ومكنش في مشاكل بيننا غير إنها كانت بتضايقني
س: ما هي طبيعة تلك المضايقات تحديدا؟
ج: هي كانت من سنة من أيام الخطوبة بتاعتي بتضيقني وأسلوبها متغير معايا حتي وانا بشتري شبكتي جت من غير ما تقول لصاحبتي الأنتيم وضايقتها واحنا في المحل وخليتها محضرتش الخطوبة بتاعتي وحتي يوم الخطوبة لما جيت اتصل بأصحابي قالتلي هما لو بيحبوكي كانوا جم وقالتلي صحابك مجوش ليه، وعلي الرغم من كده مكنتش بتحكيلي حاجة خالص وعايزني انا اللي احكيلها كل حاجة.
ومن فترة والدتي جالها العصب السابع وكانت بتعمل جلسات علاج طبيعي، وأنا كنت مخنوقة ومكنتش بكلم حد وبعتتلي رسالة لما مردتش عليها قعدت تهزقني وبعتلها صورة الكشف بتاع ماما كملت زعيق ليا ومقالتليش حتي ألف سلامة، وبرضو في مرة تعبت كانت عارفة وبتتكلم مع خطيبي ومش بتكلمني تقولي سلامتك بس انا قلت اطلع أحسن منها ورحتلها العيادة علشان مش بحب يفضل حد مش بيكلمني وبرضو فضلت مبتكلمنيش غير قليل بعدها.
س: ومتى تكونت لديكم نية القتل؟
ج: من نحو شهرين.
س: وما سبب ذلك تحديدا؟
ج: قررت كدا لأني كنت متضايقة جدا منها ومش عارف اعمل فيها ايه عشان افش غلي.
س: ما الأفعال التي بدرت منكي تحديدا آنذاك؟
ج: خدت رقم مصطفي وكلمته عشان أقوله علي الموضوع.
س: وما علاقتك بسالف الذكر وهل من خلافات؟
ج: هو جارنا من البلد وقريبنا من بعيد ومفيش اي خلافات.
س: وما سبب اختيارك لشخص مصطفى تحديدا؟
ج: لان مصطفى كان بيجي عندنا المحل بتاع أبويا يشترى حاجات ومكنتش اعرف غيره، بالإضافة أنه قریبی وجاری من ناحية عائلة أمي وكمان عارفه ان مصطفي عقله صغير وهيوافقني في كل حاجة.
س: ومتى تم أول اتصال فيما بينكم؟
ج: في شهر يونيو اللي فات
س: وما هي كيفية الاتصال فيما بينكم؟
ج: کنت بتصل بيه علي تليفونه وبنتكلم ساعات على الواتس.
س: وما طبيعة الحوار الذي دار فيما بينك وسالف الذكر تحديدا آنذاك؟
ج: انا قلتله ان نجلاء تبقي صاحبتي وإنها سرقت مني خاتم وحلق وايفون، وإنها رافضة ترجعلي ألف جنيه اخدتها مني واني متغاظة منها وعايزة افش غلي فيها واخلص منها.
س: هل أجابك الأخير لطلبك؟
ج:ايوه.
س: وما سبب موافقة مصطفي لكي وما وجهه الاستفادة التي تعود عليه ؟
ج: هو انا أقنعت مصطفي إنه يجي معايا علشان اخلص منها لان هي كانت سبب تعب في حياتي، وهو وافق شهامة منه وعشان يرجعلي الحاجة إن انا أقنعته أنها مسروقة مني وكمان عرضت عليه فلوس لو خلصنا الموضوع بس محددتلوش المبلغ، وكمان انا عارفه ان مصطفي عقله صغير وهيوفقني في كل حاجة.
س: وهل قامت المجني عليها بسرقة ثمة منقولات خاصة بكي كما قررتي للمدعو مصطفي؟
ج: لا انا قولتله الكلام ده علشان أقنعه إنه يجي معايا ونقتل البت وافش غلي فيها بسبب المشاكل اللي كانت عملهالي بيني وبين خطيبي وكانت مخلياني أفكر في المشاكل دي دايما وفي حالة اكتئاب.
س: وما هي المشاكل التي كانت بينك وبين خطيبك في تلك الفترة؟
ج: هو كان عايز يسبني علشان هي كانت قالتله کلام عني مش كويس اني اعرف حد قبله وغلطت معاه
س: ما مضمون الاتفاق والذي تم فيما بينك والمدعو مصطفي للوصول لغرضكم آنذاك؟
ج:هو إحنا فكرنا كتير موصلناش لحل بعد كدا مصطفي بعتلي اسم دواء منوم والده بياخده بس بتركيز قلیل واتفقنا اني أجيبه تركيز عالي وأروح بيه العيادة لنجلاء ادوبهولها في عصير وهو يستناني تحت بتوك توك ناخدها ونمشي نموتها ونسيبها علي الطريق.
س: وما الإجراءات التي قمتم بإتباعها لتنفيذ ذلك المخطط؟
ج: انا رحت الصيدلية وقلتلهم اسمه وطلبت شريط من الدواء وهو بعتلي صوره توك توك وقبل مننفذ اي حاجة رجع قالي مش هينفع عشان ملقاش توك توك وكنت كمان بعتاله صورتها علي الواتس وهو راح العيادة يتأكد من شكلها.
س: ما عدد مرات تردد المدعو مصطفي علي محل عمل المتوفاة إلي رحمة مولاها؟
ج:هو راح مرتين.
س: هل كان سالف الذكر بمفرده آنذاك؟
ج: ايوه هو راح لوحده انا مكنتش معاه.
س:ما سبب ذهابه تحديدا آنذاك؟
ج: عشان يتأكد من صورتها عشان لما ننفذ القتل.
س: وما هي الأفعال المادية التي بدرت من سالف الذكر آنذاك ؟
ج: هو راح مرة تحت المول شافها وهي نازلة من الشغل في العيادة، وأنا كنت معرفاه مواعيدها ومرة تانية طلع فوق دخل العيادة وسألها علي الدكتور.
س: وما هي الأدوات التي قمتم بإعدادها لارتكاب تلك الواقعة؟
ج: برشام اسمه كلوزبيكس تركيزه 100
س: ومن القائم على شراء تلك الأقراص؟
ج: انا لوحدي.
س: ومن أين تم التحصل عليها؟
ج: من صيدلية عند الكوبري الواطي.
س: وهل تمكنتم من الوصول إلى غرضكم آنذاك؟
ج: لا
س: وما الذي حال دون ذلك؟
ج: علشان ملقناش توك توك.
س: وما هو تاريخ الشروع بتنفيذ الواقعة الأولى؟
ج: من نحو شهر.
س: هل تم التوجه لمحل عمل المتوفاة إلي رحمة مولاها لتنفيذ ذلك المخطط؟
ج: انا احتفظت بالبرشام معايا في شنطتي.
س: وهل اتفقتي علي إرجاء التنفيذ وتم تحديد ميعاد أخر آنذاك؟
ج: انا قولتله خلاص مش هينفع دلوقتي ونبقي نخلص الموضوع دا في العيادة بس ساعتها محددناش میعاد تنفيذ.
س: وما الذي حدث عقب ذلك؟
ج: انا كنت في يوم مخنوقة وكلمت مصطفي قلتله إحنا لازم نخلص الموضوع قالي إنه هيكلم محمد عشماوي يساعدنا في الموضوع وأنا وافقته.
س: ومتي تم ذلك الاتصال تحديدا ؟
ج: في أواخر شهر سبعة.
