الممرض كان بيجي البيت يلعب مع الكلب.. أقوال الطبيب في واقعة السجود للكلب | خاص
كشفت التحقيقات في واقعة السجود للكلب المتهم فيها الدكتور عمرو خيري، رئيس قسم العظام بجامعة عين شمس، وطبيب آخر بمستشفى النزهة الدولي وموظف، تفاصيل إهانة الممرض عادل سالم والتنمر عليه والسخرية منه.
نص التحقيقات مع طبيب واقعة السجود للكلب
ويواصل القاهر 24 نشر التحقيقات مع الطبيب عمرو خيري المتهم الرئيسي في واقعة السجود للكلب، وجاء نص التحقيقات مع الطبيب على النحو الآتي:
س: ما قولك فيما نسب إليك من اتهامات تلوناه عليك شفاها بصدر المحضر؟
ج: الكلام دة كله محصلش
س: ما تفصيلات ما حدث إذن؟
ج: اللي حصل ان أنا شغال طبيب في مستشفى النزهة الدولي وعندي ممرض اسمه عادل سالم بيشتغل معايا بقاله أكثر من ثلاثة وعشرين عاما بحكم العشرة اللي ما بينا أخذنا على بعض وبقيت بعمله زي صديق وتعودنا أن بعد يوم العمل الشاق، نهزر ونمزح مع بعض وناكل مع بعض ونصلي مع بعض وهو كان بيجيلي البيت أحيانا وعند ما يشوف الكلب قعد يلعب معاه ولما الكلب بتاعي مات أنا حزنت عليه جدا ولما عادل سالم شافني حزين قالي أنت حزين ليه قولتله عشان الكلب مات وابتدى يهزر معايا ويمزح على حزني على الكلب.
في مرة كان هو عندي في المكتب وعادل قعد يهزر معايا ويقولي أنت لسه حزين على الكلب وكان موجود في العيادة ساعة السكرتير اسمه عمرو محمد رفعت والدكتور معتز مسعد جمال الدين وقعدنا نهزر وخليناه يلعب رياضة ودي مش أول مرة وفيه كذا فيديو وهو بيلعب رياضة وبعد كده فوجئت أن الفيديو دة انتشر على مواقع التواصل الاجتماعي والفيس قعدت تهاجمني بعد انتشار الفيديو ده واتقبض عليا النهاردة الفجر وجيت على النيابة النهاردة وهو ده كل اللي حصل؟
س: متى وأين جرى ذلك تحديدًا؟
ج:أنا لما كنت بهزر مع عادل كان من نحو أكثر من ستة أشهر في مستشفى النزهة الدولي الكائنة في مساكن شيراتون - النزهة - القاهرة.
س: ما هي حالتك الاجتماعية؟
ج:أنا متزوج منذ عام 1991 ولدي ابنتين.
س: ما هي مؤهلاتك الدراسية تحديدا؟
ج: أنا حصلت على بكالوريوس طب وجراحة من جامعة عين شمس عام 1985 وحصلت على ماجستير في جراحة العظام من جامعة عين شمس عام 1988 وحصلت على دكتوراه جراحة العظام من جامعة عين شمس عام 1991.
س: ما هي طبيعة عملك تحديدًا؟
ج: أنا بشتغل استشاري في جراحة العظام بمستشفى النزهة الدولي وأستاذ جراحة عظام بجامعة عين شمس ومستشفياتها: الدمرداش، عين شمس التخصصي، الطلبة، الميداني، العزل بالعبور، وأشغل حاليًا رئيس أقسام جراحة العظام بكلية الطب جامعة عين شمس.
س: منذ متى وأنت تباشر ذلك العمل؟
ج: انا بشتغل في جامعة عين شمس منذ عام 1985 وبشتغل في مستشفى النزهة الدولي منذ 1989.
س: ما هو تخصصك تحديدًا؟
ج: أستاذ جراحة عظام ومفاصل صناعية وإصابات وأنا مؤسس جراحات المفاصل الصناعية بجامعة عين شمس
س: كيف جرى تدرجك الوظيفي؟
ج: أنا من سنة 1985 لسنة 1988 نائب قسم العظام بجامعة عين شمس، ومن سنة 1988 إلى 2001 حتى الآن أستاذ بجامعة عين شمس.
