قصة كفاح عم مسعد.. 50 عامًا يتجول بدراجته لتصليح البوتجازات في الدقهلية
سبعيني يتجول بشوارع المنصورة بدراجة متهالكة، عليها لوحة تصليح جميع أنواع البوتجازات، ويعمل في هذه المهنة منذ 50 عامًا، بحثًا عن لقمة العيش.
يقول عم مسعد خلال بث مباشر مع القاهرة 24: أنا بشتغل في المهنة دي من وأنا عندي 25 سنة، وحاليا عندي 75 سنة، كل يوم بنزل أخد العجلة وأتمشى في الشوارع بحثًا عن لقمة العيش.
وأضاف: البداية كان في شخص اسمه محمد موافي بيشتغل في المهنة دي، هو علمني وبدأت أشتغل في تصليح بوتجازات المصانع، ومع الوقت بقيت أصلح كل أنواع البوتجازات.
واستكمل: أنا عندي 4 أولاد الحمد الله علمتهم وجوزت 3 منهم، بفضل الشغلانة دي، ولكن معنديش حد في أولادي اتعلمها.
وتابع: الناس بتشوفني أحيانا في شباب صغير يقول كلام يضايقني، ولكن في ناس كتير بتحبني وبتدعيلي.
واستكمل: بروح عند زباين ويقولوا إنه كان في حد جه قبلك وصلح البوتجاز وخد 300 جنيه مبلغ كبير، أنا بأخد 50 جنيه بس وبحمد ربنا، معرفش ليه الناس بقيت طماعة.
واختتم حديثه: أنا نفسي في شقة لأن بدفع إيجار وكل سنة بيزيد، وبقول للشباب في شغل كتير بس أنت أسعى.
فيما أعرب نجله محمد، عن فخره بمهنة والده، قائلا: أنا فخور بوالدي هو كبرنا وعلمنا أحسن تعليم، وجوز أخواتي، ربنا يطول عمره ويبارك فيه.
