أنا مُسجل علاقات وهي ديكتاتورية.. أبرز تصريحات أحمد سعد وزوجته في برنامج 90 دقيقة
تحدث الفنان أحمد سعد عن علاقته بزوجته الجديدة علياء بسيوني، وكواليس حفل الزفاف ومشاكله السابقة والانتقادات التي تعرض إليها.
وحل الفنان أحمد سعد وزوجته علياء بسيوني، ضيفا على الإعلامية بسمة وهبة في برنامجها 90 دقيقة المذاع عبر قناة المحور.
ويستعرض القاهرة 24 في السطور التالية أبرز تصريحات أحمد سعد وعلياء بسيوني خلال لقائهما مع بسمة وهبة:
تصريحات أحمد سعد في برنام 90 دقيقة
- كنت حريص على إني أعبر عن حبي بالتصرفات، وحبيتها من أول ما شفتها وهي مختلفة جدا عني وعن أسلوب حياتي في كل حاجة.
- ذوقها حلو جدًا في اللبس، وكل أصحابها بيسألوها عن لبسهم، وهي ديكتاتورية فوق الوصف في اللبس والذوق، واختارت لي كل الحاجات اللي في دولاب.
- أنا مسجل علاقات وعندي مشاكل والناس كلها عارفة، وحاولت أعمل معاها اللي فشلت أعمله في حياتي، بحيث إن علاقتنا مع بعض متبقاش على السوشيال ميديا عشان يبقى في خصوصية ونستمتع بيها.
- حاسس إني أول مرة أرتبط في حياتي، وده بسببي أنا، في حاجات كتير في حياتي معملتهاش عملتها دلوقتي، وكنت دايمًا ناقم عليها، مكنتش بعمل حاجات الناس الطبيعية لكن مع علياء عملتها بسبب السن والاختلاف.
- عشان أقدر أتقدم في حياتي مابقتش أشوف مشاكل في حد تاني، بقيت أشوف عيوبي أنا بس، عيوب الآخرين بتاعتهم، عشان أقدر أرتقي بنفسي، لكن مينفعش أبقى عايش في مظلومية وشماعة.
- لم أستخدم البوتكس أو الفيلير لسه موصلتش للحاجات دي بس هروح لها ومعنديش مشاكل معاها، لكن كان عندي مشكلة في الفك بسبب أسناني، والدكتور ظبطهالي من غير عملية جراحية، مفيش عمليات تجميل، لكن ده رباني.
تصريحات علياء بسيوني زوجة أحمد سعد في برنامج 90 دقيقة
- أحمد سعد لذيذ وأنا بتبسط من الناس اللي بيبقى ليها شخصية في القعدة وعنده كاريزما ويدخل في أي حتة نحس بيه، لكنه كان شبهي في إنه مزاجي وبنحب التحديات، كان يظهر ويختفي، فكان الاختفاء بيستفزني.
- أحمد لو كان وحش، كان هيبقى له رد فعل في أي حاجة في المشاكل اللي حصلت، مش معقولة دايما القصة تبقى من طرف واحد، مش معقولة المشاكل كلها تيجي من طرف واحد، في جانب مفقود من القصة، ولو كان وحش كان رد ودافع عن نفسه.
