والله احنا لينا لازمة عنكم.. خناقة بين الليثي وأحد مشاهير السوشيال ميديا
شهدت الساعات الماضية خلافات بين الفنان محمود الليثي وأحد مشاهير السوشيال ميديا، بسبب حديث الأول عن أن الانفلونسر على السوشيال ميديا ليست مهنة، وذلك بعد تعطل فيسبوك وانستجرام وواتس آب أمس 6 ساعات متواصلة.
وردت البلوجر مريم سيف على رأي الليثي من خلال ستوري على انستجرام بالآتي: معلش يا أستاذ محمود الفاضل وأنت كنت إيه لما طلعت واللي شهرك اليوتيوب وبعدها بقيت ممثل؟.. وبعدين متنساش إن الممثلين دلوقتي لما بينطفوا مرة مبيرجعوش تاني وأنت شغلانتك إيه؟ مش قدام الكاميرا زينا ولا إيه؟ ولو الكهربا قطعت بتنطفو أنتو كمان ولا إيه النظام؟ قالك أنفلونسر مش شغلانة ع الأقل احنا لينا نفع عنكم والله.. طب خلي ممثل كبير يتكلم طيب يا جدع مش كده.. أنا قولت محمود حميدة بيتكلم مثلًا اتخضيت لما لقيته محمود الليثي.
علق الليثي على اتهاماتها له عبر ستوري على انستجرام، قائلًا: بصي يا أستاذة ياللي مش عارفك أولًا أنا مغلطش فيكي لشخصك وأنت غلطي فيا.. ثانيًا أنا ليا أصحاب كتير أنفلونسر وأشهر منك بمراحل أخدوا الموضوع بهزار عادي دا لأن فعلًا دي مش شغلانتهم الأساسية.. ثالثًا لو أنت شايفة إن الممثل مش بينفع الناس وأنت بتنفعيهم فدا قلة فهم منك ودا مش هلومك عليه عشان دي حاجات مينفعش نشتريها.. بنتولد بيها.
وتابع الليثي حديثه: رابعًا كونك تقول دا مكنش معاه 10 جنيه يركب مترو وتتريقي على دا.. فدا مصدر فخر ليا إني كنت أمل لشباب كتير إنهم يبدأوا من الصفر وينجحوا.. ورحلة كفاح انبسط إن الناس تعرفها.. خامسًا الفن دا مهنة زيه زي الطب والهندسة ولو حضرتك بتقرأي في التاريخ هتعرفي إنه موجود من يوم ما اتوجدت الحضارة وغير شعوب، عمل ثورات مش مرتبط بالكهرباء زي ما بتقولي.
واختتم الفنان حديثه قائلًا: وأخيرًا لو الأستاذ محمود حميدة شاف كلامك دا كان هيخليكي تعتذري للفن والفنانين كلهم اللي بتقللي من دورهم وكان هيفهمك ازاي تتكلمي بأسلوب راقي عن كدا.
آخر أعمال محمود الليثي
طُرح مؤخرًا فيلم أعز الولد من بطولة محمود الليثي ودلال عبد العزيز وشيرين وميرفت أمين ورجاء الجداوي وأمينة خليل، بالإضافة إلى مشاركته في الموسم الرمضاني الماضي 2021 بمسلسل بين السما والأرض مع الفنان هاني سلامة ودرة.
