ما تخليش السوشيال تسيطر عليك.. فتاة تطلق حملة بـ الميك آب لمقاومة تأثير مواقع التواصل على حياتنا
المكياج مش مجرد فرشة وألوان بل هو أداة للتعبير عن قضايا المجتمع.. هكذا وصفت إيڤا عماد، صاحبة حملة استخدم السوشيال ميديا مش هي اللي تستخدمك، للتوعية ضد الاستخدام المفرط لمواقع التواصل الاجتماعي، استخدامات الميك آب المتعددة.
تعمل إيڤا في مجال التجميل، حيث تستخدم الميك آب التجميلي المتعارف عليه، والـ 3D، وهو فن الرسم على الوجه والجسم برسومات مجسمة، ثم ميكياج SFX، وهو نوع خاص بالمؤثرات الخاصة، مثل الجروح والماسكات والحروق والحوادث السينمائية، وأخيرًا ميك آب الشخصيات.
تقول إيڤا لـ القاهرة 24: الميك آب أكتر طريقة بحب أعبر بيها عن حدث أو احتفال أو قضية، وعن أي حاجة حوالينا بتحصل، عشان كدة قررت أنى هعبر عن تأثير السوشيال ميديا في حياتنا وعن قضايا تانية كمان.
تحت شعار استخدم السوشيال ميديا مش هى اللى تستخدمك، أطلقت الفتاة حملتها على مواقع التواصل الاجتماعي، بهدف توصيل مدى خطورة السوشيال ميديا على حياتنا، وتأثيرها على صحتنا.
تضيف إيڤا: هدفي منها إن الناس اللى بتتفرج على صور الحملة تشوف نفسها فيها، وتشوف مدى تأثيرها علينا وممكن توصلنا لحد فين، ومدى الواقع اللي إحنا عايشينه، عشان اللي يقدر يساعد نفسه ويقدر يتحكم فيها قبل ما يوصل لمرحلة الإدمان، أو يلحق نفسه لو وصل لها بالفعل.
سبب اختيار هذا الموضوع للتعبير عنه بالميك آب هو كون السوشيال ميديا أكثر الأشياء التي تضيع وقت الفراغ: أكبر وقت في يوم كل حد فينا بيقضيه على موبايله، فحبيت أبدأ بحملة أنا شخصيا حاسة بتأثيرها عليا ولمساه، وقررت أتخلص منه ونفسى أشجع أكبر عدد ممكن من الناس على ده.
وتابعت: المكياج مش مجرد فرشاة وألوان، إحنا ممكن نتكلم بيه، والفن من أجمل وأبسط الطرق للتعبير، وأنا بحب الرسم من طفولتى وبدأ يتطور الموضوع، واحدة واحدة لحد ما اكتشفت شغفي بالميك آب واشتغلت عليه.
لم تكن تلك الحملة التوعوية هي الأولى في حياة إيفا، بل أطلقت عدة حملات من قبل، وأبرزها شكرًا الجيش الأبيض، للتعبير عن معاناتهم وقت انتشار فيروس كورونا، وهي بمثابة رسالة شكر وامتنان لهم.
الحملة الأخرى التي قامت بها، هي حملة لا للعنصرية، التي أطلقتها تضامنا مع محمود عبد الرازق شيكالابا، لاعب نادي الزمالك، للتصدي للتنمر الذي تعرض له، وتشجيع الجميع على تقبل الاختلاف في الآراء والأفكار، والآن تستعد لإطلاق بعض الحملات الأخرى خلال الفترة المقبلة.
