والد حمادة صميدة: بقالي 27 سنة في مهنة بيع الأنابيب ومكنتش حابب إنه يمثل
تحدث والد الفنان حمادة صميدة عن حياته الخاصة وامتهانه بيع أنابيب الغاز لمدة 27 عامًا، بعدما تداول متابعو مواقع التواصل الاجتماعي صورة جمعته بنجله حمادة خلال تأدية عمله.
وقال والد الفنان حمادة صميدة، خلال لقائه القاهرة 24، إنه يعمل بائع أنابيب غاز منذ زمن بعيد وأنه لا يخجل من عمله، وأعرب عن امتنانه لوالده الذي شجّعه على العمل منذ صغر سنه: بقالي 27 سنة في الشغلانة دي والدي شغلني وأنا عندي 5 أو 6 سنين في الغيط، وده اللي خلاني قادر أقف على رجلي دلوقتي عندي 65 سنة بفرح لما حد ينادي عليا عايز أنبوبة.
والد الفنان حمادة صميدة
كما كشف والد الفنان حمادة صميدة أنه لم يكن يريد دخول نجله المجال الفني، معقبًا: حمادة كان معايا وهو 7 سنين ووالدته مطلقة، وشغالين في منطقة البساتين في مهنة الأنابيب والجراچ، كان بيجري لما يعرف إن الفنان محمد سعد في التليفزيون.
وتابع: الفنان محمد سعد كان في بداياته وحمادة كان بيجي يقولي أنا عايز أمثل، قولتله تمثل إيه إحنا عايزين نأكل عيالنا.
وأشار إلى أنه شعر بالفخر عندما رأى نجله في التليفزيون قائلًا: لما لقيته في التليفزيون وبدأ يظهر والناس بتحبه، حتى لو طلع في لقطة واحدة كفاية إني شوفته في التليفزيون، والناس بتقابلني تقولي ابنك طلع في التليفزيون، وببقى فخور بيه وفرحان.
والد حمادة صميدة
أما عن أولاده فأوضح أنه لديه 10 أبناء، معربًا عن فخره بهم قائلًا: أنا أولادي من 4 أمهات ولما تشوفهم تفتكر إنهم من أم واحدة، أنا تعبت في حياتي لكن ربيت أولادي، الحمد لله عندي 10 أولاد، وزوجت 7 ومعايا 3 أصغرهم في الصف الثالث الابتدائي.. وأنا لازم أتعب وأشقى عشان أوفر لأولادي كل حاجة.
