أحمد السقا: لسه بتوتر في أول يوم تصوير.. وحريص على مذاكرة أدواري بشغف
قال الفنان أحمد السقا إنه لا يزال حريصًا على مذاكرة الأدوار مثل التلميذ المبتدئ وأن الشغف الفني لم يمت يومًا ما خلال مسيرته الفنية.
وأضاف أحمد السقا، خلال لقائه ضمن برنامج كلمة أخيرة الذي تقدمه الإعلامية لميس الحديدي على شاشة ON: أقسم بالله لما ببقى نازل أعمل دور مهم وأنا حابه، أول يوم وفي أول ساعة لحظة التصوير بتبقى رجلي بتخبط في بعضيها وكأنها أول مرة، وببقى برتعش وإيدي مهتزة، عشان كده لسه لحد دلوقتي حاسس إني تلميذ، وبفضل متوتر لحد ما يحصل التدفق الفني.
وأوضح أحمد السقا أنه بعد كل هذه السنوات لا يزال حريصًا على مذاكرة ودراسة الأدوار وكأنها أول مرة، معقبًا: يعيش المعلم ويتعلم طول الوقت لسه بذاكر الشخصية، ودي بتبقى أكتر فترة ذهنية مرهقة، وأنا بلم تفاصيل كل شخصية بعملها.
وتابع السقا: قبل خوض الدور ببقى عاوز أعرف الشخصية بيضحك إزاي وبيأكل إزاي عشان أكون كيان، لازم أتفرج عليها الأول في خيالي لحد ما أتقمصها وعفريتها يلبسني.
أزمة أحمد السقا فى الجونة
وعلى جانب آخر، قدم أحمد السقا اعتذارًا على تصريحاته الأخيرة عن السينما، عندما وصفها في فترة النكسة 1967 بخلقها ضيق.
ونشر أحمد السقا لايف، عبر حسابه الشخصي بموقع التواصل الاجتماعي فيس بوك، قال فيه: مكنتش أقصد أغلط في حد، كنت بتكلم إن حجم الإنتاج في الحرب بيكون دايمًا أقل، ومغلطتش في حد، كل الناس أساتذتي، مكنتش أقصد إساءة للسينما.
