منتقدة مهاجميها.. ماجدة خير الله عن بطلة ريش: ازاي صعيدية تعمل راسها براسنا؟
علقت الناقدة الفنية ماجدة خير الله على الهجوم الكبير، الذي تعرضت له الفنانة دميانة نصار، بطلة فيلم ريش، بعد ظهورها على السجادة الحمراء، أثناء العرض الخاص للفيلم، مشيرةً إلى أنها تعرضت للهجوم من قبل بعض المشاركين بالمهرجان، الذين رفضوا أن تصبح هذه الفنانة الصعيدية بنت المنيا مثلهم.
وكتبت ماجدة خير الله منشورًا، عبر حسابها الشخصي بموقع التواصل الاجتماعي فيسبوك، قائلة: في فيلم شاطئ الغرام، الذي لعبت بطولته ليلى مراد مع حسين صدقي، كانت تقدم دور فتاة بسيطة، وأحبها شاب ثري تطمع فيه بعض النساء، وأرادت ميمي شكيب، وهي ضمن شلة (حرابيق) جمع حربوقة، أن تسخر هي وابنتها ومعهما الشرير الظريف استيفان روستي من ليلى مراد ويعايروها بفقرها.
ماجدة خير الله
وتابعت ماجدة خير الله: استغلوا فرصة حفل يحضره جمع غفير، وطلبوا منها الغناء على أساس أنها هتتفضح.. فكرة غبية قوي، ويبدو ماكانوش واخدين بالهم إنها ليلى مراد.. المهم بعد ما غنت يا عز من عيني، والناس قطعت إيديها من التصفيق، قال استيفان روستي للحربوقة اللي كانت عايزة تحرجها، تلك الجملة السينمائية الشهيرة جدا: بقي دي اللي كنتي عايزه تهزئيها، اللي ما في حد ما أعجبش بيها.
وأضافت ماجدة خير الله: افتكرت الجملة والموقف من سخرية البعض من فيلم ريش، لأنه بيتكلم عن الفقراء، ومش كده وبس لا ده كمان، استعان بسيدة عادية جدا هي دميانة نصار، لتلعب دور البطولة وتمشي على السجادة الحمراء.. زيها زي أجدع نجمات مصر، اللي شعروا بالضيق.
فيلم ريش
واستكملت ماجدة خير الله حديثها: إزاي واحدة زي دميانة تشاركهن المجد والشهرة، وتمشي على نفس السجادة اللي بندوس عليها بقالنا نصف قرن، إزاي الصعيدية الغلبانة، تعمل راسها براسنا، وإحنا اللي بناخد ملايين؟! وإزاي فيلمها يأخد جوائز وإحنا راحت علينا، يا ختي إخيه إخيه.
واختتمت ماجدة خير الله: بس شوف بقى إرادة ربنا.. يخلي دميانة البسيطة التلقائية تاكل الجو، دون أن تقصد، وفستانها البسيط يثير الإعجاب، وكلامها العفوي يدخل القلب.. بقى دي اللي كنتوا عايزين تهزؤوها، اللي ما في حد ما أعجبش بيها.
