ممل ومش عارفين أخد الجائزة ليه.. الجمهور يهاجم فيلم ريش بعد تسريبه
أثار فيلم ريش ضجة كبيرة بعد عرضه في مهرجان الجونة السينمائي، بالدورة الخامسة منه، عندما وجده عدد كبير من الفنانين يسيء لمصر وأولهم الفنان شريف منير الذي رفض استكمال مشاهدة الفيلم، ولكن بعد تسريبه، أوضح المشاهدون رأيهم في الفيلم، ولكن المفاجأة أن معظم الآراء كانت سلبية.
آراء الجمهور في فيلم ريش
كتب المؤلف أيمن سليم في منشور عبر حسابه الرسمي بموقع التواصل الاجتماعي فيس بوك: مع كامل احترامي لكل الدوشة اللي حصلت دي.. أنا لسة مخلص فرجة على فيلم ريش، ليه فيلم آخره أوي يبقى فيلم قصير مدته 10 دقايق يتقدم في ساعتين؟.. أمال لو كان حلو كنتوا عملتوا فينا إيه؟!.. ملل وزهق وجالي ضيق تنفس في بعض المشاهد، ورغم إني حبيت قصة كفاح الأستاذة دميانة بنت المنيا وتعاطفت معاها قبل ما أشوف الفيلم.
وتابع أيمن سليم في منشوره: لكن بعد ما شوفته تعاطفت مع الإعلامية بوسي شلبي.. إيه يا دميانة ده؟، إنتى مامثلتيش بربع جنيه، أمال جايزة إيه وكان إيه؟.. تجربة مريرة مانصحش أي حد إنه يضيع ساعتين من عمره فى الهزي ده.. وحقيقي أنا هحاول أحب الفنان شريف منير الفترة الجاية.
وعلق الكاتب الصحفي عبد الله غلوش على الفيلم قائلًا: مبدئيا معرفش مين اللي سرب الفيلم وبجودة hd وسايبه بقاله 10 ساعات من غير أي ريبوتات، في رسالة واضحة بأنه تسريب متعمد.. للأمانة الفيلم لا يشوه سمعة مصر، لكنه بيشوه سمعة السينما المصرية.. إيه الفيلم الممل ده يا جماعة، فيلم آخره 10 دقايق كان يبقى عظيم، لكن تقعد تمط في مشاهد صامته ساعة ونص ليه؟.. بعدين الفيلم لما تشوفه بيسقط من نظرك ناس كتير على رأسهم لجنة تحكيم مهرجان "كان" اللي متفهمش بيمنحوا الجوائز على أي أساس أو وفقًا لأي اعتبار.. الله يسامح شريف منير اللي بقالنا 3 أيام مصدعين بسببه، لو كان اتفرج وسكت كان ارتاح وريحنا جميعًا من الكلام عن فيلم لا يستحق تضييع ساعة ونص من عمرك في مشاهدته.
وكتب الفنان خالد تاج الدين في منشور عبر حسابه الرسمي بموقع التواصل الاجتماعي فيس بوك منشور قال فيه: عايزين يقارنوا فيلم ريش بأفلام محمد خان وعاطف الطيب.. سوري في الكلمة اللي قولتها بس مكتبتهاش.
وكذلك آراء الجمهور كانت سلبية، حيث كتبت فتاة عبر حسابها الرسمي بموقع التواصل الاجتماعي فيس بوك، منشور قالت فيه: الواحد جاي ورقبته قد السستمة والله من فيلم ريش يعني حاسة إن شريف منير انسحب عشان ممل وبطىء فاتكسف وقال مسيء لمصر.. لا فيه تمثيل ولا قصة والحقيقة نوعية الأفلام اللي بيركزوا فيها على أمور مقرفة بتضايقني كذا مشهد فيه.. والست دميانة دي مامثلتش بجنيه وباردة.. والست فضلت مشهد تقول ملبوس ملبوس نصاب ملبوس نصاب نصاب ملبوس بتاع 30 مرة.. أنا قفلت الفيلم من نصه.
وكتب شخص آخر عبر حسابه الرسمي بموقع التغريدات القصيرة تويتر تغريدة قال فيها: اتفرجت على فيلم ريش هو ممل جدًا الحقيقة والبطلة دورها صامت طبعا عشان أنا مش سينيمائي ومش بفهم في الكادرات والكلام ده بس لو حد شافه يفهمني هو أخد جايزة في إيه؟.
وكتب الفنان عمر خورشيد عبر حسابه بـ الفيس بوك عن الفيلم قبل أن يشاهده: بعد متابعة آراء وتعليقات المشاهدين.. اتضح لي أن بتوع مهرجان كان أدوا الجائزة للفرخة.
