عندي صاحبة واحدة.. ياسمين صبري: معنديش أصحاب كتير ولا شلة
حلت الفنانة ياسمين صبري ضيفة برنامج أنس بوخش، المذاع عبر قناته الرسمية على موقع الفيديوهات الشهير يوتيوب، متحدثةً عن العديد من الجوانب في حياتها الشخصية.
وقالت ياسمين صبري: معنديش صحاب كتير ولا شلة ممكن عندي صاحبة واحدة بس، يمكن ده يرجع لتربيني عشان حياتي كلها كانت في التمرين وكنت بضايق وأحس إن ده عذاب بس ده حماني من أخطاء كتير كان ممكن أقع فيها.
وأضافت: وقت كورونا كان شبه حياتي العادية ماعدا السفر لأني بحب أسافر أوي وأنا بعرف استثمر وقتي، وأنا خريجة إعلام ولكن ديمًا عن عندي شغف تجاه علم النفس وأول كتاب قرأته كان اسمه The Secret، والموضوع اتطور وقررت أدرس في جامعة هارفرد علم نفس، واخدت 3 كورسات منهم علم النفس الاجتماعي والمرونة النفسية.
وتابعت ياسمين صبري: مايضيقنيش إن الناس تحصرني في قالب ست جميلة، لأن الشخص ده بيحدد لنفسه النظرة دي وهو اللي محدود مش أنا، وفيه حاجة في الطاقة أحب أعلمها للناس وهو إن أي شيء سلبي وبالأخص لو كان حكم عليك يعتبر فرصة ليك إنك تحوله للشيء اللي أنت عايزه.
واستكملت حديثها، قائلة: زي عندنا في الدين الإسلامي الواحد يبقى لسه مخلص صلاة وبعدها يقعد ينم، فهو بالطريقة دي بيبعت حسناته اللي كان قاعد بيستثمر فيها لحد تاني، ويؤسفني إن مجتمعنا الشرقي اللي بنتمي له يكون ده فكرنا، أنا مقدرش أغير العالم ولكن أقدر أغير نفسي بإني مقعش في الفخ ده بإن فكر اللي قدامي مايحددنيش.
