شيرين رضا: أنا ضد فكرة الجواز لنفسي مش لبنتي.. عاوزاها تجرب وتبدأ حياتها
ردت الفنانة شيرين رضا، على التساؤلات حول علاقتها بابنتها نور عمرو دياب، خاصة أن الأخيرة تعيش خارج البلاد منذ 10 سنوات وأعلنت خطبتها مؤخرًا من شاب بريطاني.
وقالت رضا، إنها ليست ضد فكرة الزواج لابنتها، متابعة: أنا سعيدة لما هيا تبقى سعيدة الناس كانت فاكرة أن أنا ضد الجواز.. أنا ضده صحيح بس لنفسي.. لكن هي لو عايزة تمر بالتجربة دي من حقها.
وكشفت أنها لم توجه أي نصيحة لابنتها قبيل خطبتها من واقع تجربتيها كأم في الزواج، قائلة: مانصحتهاش لأنها شافت التجارب بتاعتي.. لكن هي دلوقتي مخطوبة خليها تجرب هتتجوز ولا لأ؟ طول ماهي مبسوطة لازم تمر بالتجربة.
أما عن هوية خطيب ابنتها نور عمرو دياب، الأجنبي فأوضحت رضا أنها لم تعترض على ذلك، قائلة: نور عايشة بره بقالها 10 سنوات وبقت أجنبية، صحيح مصر بلدها وكل حاجة لكن 10 سنوات هي فترة طويلة بعدت فيها عن كل الناس وأصحابها فصعب أوي بعد عشر سنوات ترتبط بحد من هنا، هي وحشاني أوي ونفسي تبقى جمبي بس عاوزاها تجرب وتبدأ حياتها.
كما أكدت الفنانة شريين رضا أنها لا تنزعج من ظهور ابنتها نور عمرو دياب بشكل مكثف على منصات السوشيال ميديا، قائلة: بالعكس نفسي تبقى سعيدة لأنها كانت خاصة جدًا في حياتها.. الأكونت بتاعها على السوشيال ميديا مكنش عليه غير 500 شخص محدش يعرفهم ومش بتزود المتابعين، في مرة قلتلي ماما عايزة أخلي الاكونت بتاعي public مش private ومبسوطة بده.
وأوضحت أن ابنتها تعمل بلوجر، قائلة: نور شخصية بسيطة جدًا في حياتها مبتحبش تلبس ماركات، وده طبع أخدته مني أنا كمان مش بحب أتباهى بحاجة، وأنا ست بسيطة فلما لقت أن ده مبدأها حبت يبقى هدفها كبلوجر مساعدة الناس إنها تروح البراندات البسيطة زي ZARA، وH&M، اللي تمنها بسيط وشيك في نفس الوقت.
