النص الكامل لـ مداخلة الرئيس مع شريف عامر والطفل المعجزة حافظ القرآن
أجرى الرئيس عبد الفتاح السيسي، مداخلة هاتفية، مع الإعلامي شريف عامر، مُقدم برنامج يحدث في مصر، على شاشة إم بي سي مصر، اليوم الأربعاء، في أثناء استضافة عامر، للطفل المعجزة أحمد تامر، الذي أتم حفظ القرآن الكريم وهو في سن الخامسة.
وقال السيسي: ازيك يا أستاذ شريف، وتحياتي للدكتور مبروك عطية، نماذج جميلة جدا، تحياتي لابننا أحمد، بسم الله ما شاء الله ولا قوة إلا بالله، ربنا يحفظك يا ابني، ويخليك لأهلك، ويحميك من كل شر وسوء.
وتابع الرئيس: للمرة التانية أهنيك، ومكنش ممكن يعدي عليا أبدًا إني أشوف النموذج الجميل والرائع ده، اسمحلي أسجل تقديري بيك يا أستاذ شريف على السعة والتنوع الكبير لتناولك في برنامجك، والقضايا اللي بيتم مناقشتها، وأيضًا النماذج اللي أنت بتجيبها.
وأضاف الرئيس: اسمحلي إني أوجه الكلام لأحمد، وأقولك يا أحمد بسم الله ما شاء الله عليك، ربنا يحفظ ويوفقك، ويكملك بخير، ويحميك أنت وأسرتك، وبهني والدك ووالدتك.
وأكمل الرئيس حديثه: أنت عارف يا أحمد، عارف أنت حافظ إيه، كلام ربنا، هو كلام ربنا سبحانه وتعالى، أعز كلام، وأقدر كلام، وأكرم كلام، وأطيب كلام، البركة كلها معاك، ربنا يحميك، خليني أقولك على حاجة، الحفظ جميل ومهم، ولكن الفهم كمان جميل ومهم، ويمكن أنا حبيت أعمل مداخلة؛ عشان كل اللي بيسمعنا دلوقت، يعرف إن احنا بنهتم باللغة العربية، وبنهتم بحفظ القرآن، وبنهتم أيضًا بتنظيم أوقات أولادنا.
وواصل الرئيس السيسي: ومهم أوي، في نقطة عايز أسجلها، إن الأسرة تبقى منتبهة لأبنائها، وتشوف النقاط اللي ممكن يتميزوا بيها، مش شرط يكون الحفظ بتاعتهم زي أحمد، ممكن تكون أنشطة رياضية، وملكات أخرى موجودة، الملكات دي لو نمنينها واهمتينا بيها؛ هنجد برضو النبت الجميل بيكبر، ونبقى فرحانين بيه كلنا.
الرئيس السيسي، قال أيضا: أنا بقول لأحمد واللي بيسمعنا من المصريين، مهم أوي تفهم، احفظ بس افهم، الحفظ لوحده من غير فهم مش كفاية، محدش أبدًا يقلب الحقائق لو كان فيه فهم.
وأوضح الرئيس: بالمناسبة يا أحمد تامر، أنا بدعوك في أول افتتاح، أنت تيجي تقرأ لنا ما تيسر من القرآن، في أول افتتاح، وأنا بستأذن الوالد وأسرتك، إنك تبقى في أول افتتاح لينا، تبقى أنت الشيخ بتاعتنا، وتقرأ لنا ما تيسر من القرآن.
الرئيس يشيد بالداعية مبروك عطية
ووجه الرئيس، حديثه، إلى الدكتور مبروك عطية، الداعية الإسلامي، خلال حلقة البرنامج، قائلًا: أنا سعيد أوي بالدكتور مبروك عطية، وتناوله للقضايا المختلفة، وأنا مش هقول ملاحظة ولا حاجة، وأتصور إن كل اللي بيسمعنا، عندهم ثقافات مختلفة ومتنوعة كتير، مش كل الناس هتستقبل نفس الكلام بنفس الفهم اللي بيبقى مقصود من طرحه، مش كل اللي أنا عايز أقوله، حتى لو كان له أسانيده وطريقته العلمية والفكرية، مش كلنا هنقدر نفهم بشكل متساوي، ومن هنا ممكن إن المتحدث، يراعي إن كل اللي بيسمعوا مش زي بعضهم، وتقديري لك وتقديري للأستاذ شريف، وأنا سعيد أوي بالبرنامج.
السيسي: أقدر الإعلام والإعلاميين
وانتقل الرئيس إلى الحديث عن الإعلام: يا أستاذ شريف، أنا بقدر جدًا الإعلام، وهذا المجال العظيم، إوعى تتصور إن اللي بيعمل في هذا المجال ملوش أجر، لأ ليه أجر كبير جدًا، وتعرف قد إيه إن الإعلامي المخلص لرسالته، له أجر كبير أوي، كل من هيسمعك وكل من سمع أحمد النهارده، هو ليه أجر أحمد وأسرته، وأنت ليك أجر، ولا ينقص ذلك من أجر أحد.
وأشار الرئيس إلى أن: التناول الإعلامي لأي قضية، يجب أن يتم من خلال تحري الصدق فيها، من خلال القراءة والتوسع في تفاصيلها، هتعمل كده، هنسمعك، وعشان كده بنتكلم عن إن قضية القضايا في مجتمعاتنا، إن أنت بتشوف في الدنيا اقتتال وجهل، والتجهِّل الموجود هو اللي أذينا كلنا، وتقديري لك يا أستاذ شريف وللبرنامج، وتقديري للدكتور مبروك عطية، وتقديري لأحمد تامر وأسرته الطيبة، وزي ما بقول له، الدعوة ليك يا أحمد في الافتتاح اللي جاي، هتقرأ لينا في الافتتاح اللي جاي، عشان البركة تجيلنا كلنا.
واختم الرئيس مداخلته مع شريف عامر: ربنا يوفقك يا أستاذ شريف، ودايمًا معاك الخير كله، ويعينك على الرسالة المهمة دي، ويقدرك عليها.
