أخدت كل صفات الصعايدة.. نجيب ساويرس: أنا عصبي وناشف ومش بسامح غير باعتذار
قال نجيب ساويرس، رجل الأعمال المصري ومؤسس مهرجان الجونة، إنه كان يحصل على أقل مصروف من والده خلال فترة دراسته، لأن والده كان يرى أنه بذلك سيربي- راجل ناشف- بحسب وصفه.
وأضاف ساويرس خلال حديثه مع برنامج صباحك مصري المذاع على فضائية إم بي سي مصر: إحنا كنا بناخد أقل مصروف في المدرسة، واشتغلت وأنا بدرس، واشتغلت جرسون وغسلت عربيات، عشان أعرف قيمة الفلوس وإن أكل العيش صعب.
وتابع رجل الأعمال المصري: الشغل بيعرفك ازاي تعامل الناس البسيطة، وكنت بتعامل وحش وأنا جرسون؛ عشان كده عرفت إنه لازم أعامل الناس البسيطة كويس.. أنا الابن الوحيد اللي اتولد في سوهاج، وخدت كل صفات الصعايدة، فمثلا خصومتي وحشه، ومش بسيب حقي، وباخد تاري، ومش برجع لورا، عصبي وناشف.
وأضاف نجيب ساويرس عن ما يجعله يتراجع عن خصومته مع أحد: الاعتذار هو اللي يخليني أسامحك، غير كده هفضل ليوم القيامة مش مسامح، والخيانة والطعن في الظهر والغدر والسرقة والجبن مايخلونيش أسامح أبدا.
وتابع نجيب ساويرس، حديثه: والدي كان بيتكلم صعيدي لحد آخر يوم في حياته، لكن احنا عشان كبرنا في القاهرة مش بنتكلم باللهجة الصعيدية.
