أنا اديتها أكبر من حجمها.. إسلام برجر يرد على اتهامه بخداع فتاة 9 سنوات
قال إسلام رضا، لاعب كرة طائرة بنادي الترسانة، والشهير بإسلام برجر، إنه كان على علاقة عاطفية بالفعل بالفتاة نور التي نشرت أنه خدعها لمدة 9 سنوات، وارتبط بها ولكنها فوجئت بزواجه وإنجابه بعد علاقة دامت 9 سنوات.
وأضاف إسلام خلال حديثه مع القاهرة 24: أنا اتظلمت، وناس كتير افترت عليا، لأن معايا حاجات لو خرجتها هفضحها، وأنا مش عايز كدة، أنا غلطت في أشياء، بس دلوقتي مش عايز غير مراتي وبنتي، مش عايز تريند ولا غيره.
وتابع: هي قالت إني عندي طفلين وخاطبها من 9 سنين، وده كله غلط، أنا عندي 25 سنة، مواليد 1995، يعني كنت هخطبها وأنا عندي 15 سنة؟، مضيفا: هي كانت مصاحبة واحد صاحبي، وكنت وسيط بينهم، وكانت عارفة إني متجوز، ولما ورتها صورة بنتي قالت لي أنت كداب.
وأردف: أنا بلعب كورة طائرة وهي كمان، والمجتمع ده كله أوضة وصالة، كلنا عارفين حياة بعض، ومراتي بتيجي معايا التمرين، وكل الناس عارفة إني متجوز، وأنا غلطت إني وافقت أتصور في الصورة المتداولة.
واستطرد إسلام حديثه قائلًا: أنا غلطت إني وقفت معاها، لأني كنت رايح عند أهلها زيارة، ولما وقفت أتصور معاها، إديتهم الفرصة إنهم يمسكوا عليا حاجة، وبعدها صارحت مراتي على كل حاجة، ومش هقدر أنكر إن كان في بينها علاقة عاطفية.
وأكمل: هي عارفة من زمان إني متجوز، وعلاقتنا لم تتعد الـ 7 أو 8 شهور فقط، وصارحت أمي، وأمي اتكلمت معاها أنهت كل شيء، وأنا غلطت إني إديتها أكبر من حجمها، وأنا رديت عليها على تويتر ردود عفوية.
وأوضح أن والدته تواصلت معها لمعرفة ما تريده، فأخبرتها أنها ستقدم اعتذار، لأنها لم تكن تتوقع أن الأمور ستصل إلى هذا الحد، مشيرًا إلى أن صديقها حضر حفل زفافه، وجلس معه في غرفته عدة سنوات ويعرف كل تفاصيل حياته.
أما عن موقف البرجر، يقول إسلام: أنا استشهدت بالموقف ده، لأني ورتها صورة بنتي فيه، وهي قعدت تقولي مش مصدقاك، لأنها مكنتش عارفة إني عندي بنت، وفي حاجات كتير مستحرم أتكلم فيها، والشخصية ديه أنا بكرهها.
يتابع إسلام: في ناس كتير افترت عليا ومش مسامحهم ليوم الدين، وهي كمان أنا مش مسامحها، وبرضو مش حابب أتكلم في حاجات عشان مأذيهاش، لأن أهلها ناس محترمين أنا عارفهم من نحو 7 سنين، ومشوفتش منهم حاجة وحشة.
