بعد تسليم مقتنيات أحمد زكي.. شقيقته: هقاضي كل شخص اتصرف فيها دون وجه حق
علقت منى عطية، شقيقة الفنان أحمد زكي على تسليم مقتنيات الراحل لوزارة الثقافة، من قِبَل المستشار القانوني بلال عبد الغني المحامي الأسبق لرامي بركات الأخ غير الشقيق للفنان هيثم زكي.
تعليق شقيقة أحمد زكي على تسليم مقتنياته
وقالت شقيقة أحمد زكي لـ القاهرة 24: أعترض بشدة على ما حدث فكيف لهم التصرف في المقتنيات دون وجه حق، مضيفةً: المفروض إحنا اللي كنا نسلم المقتنيات وحاجته دي، المحامي ده يقربله إيه عشان يسلم المقتنيات، بأي وجه حق يتصرف فيها ويسلمها للوزارة إذا فعلًا كان سلمها، إيه يثبت تسليمه المقتنيات؟
وأضافت شقيقة الراحل: ليه فيه تجاهل لينا، ومش هنتنازل عن المقتنيات وهنرفع قضية واتنين وعشرين، خلوا وزيرة الثقافة تتواصل معانا.. إحنا عايزين نطمن إن المقتنيات في مكان كويس وتستاهل مشوار أحمد زكي وتعبه، هو كان بيصرف على أفلامه وشغله وكل حياته في الفن.
وأشارت شقيقة أحمد زكي إلى أن المحامي كان يطلب أموالًا مقابل تنظيفه للمقتنيات، قائلةً: كأنه بيتاجر بأعمال أحمد زكي، كنت سبتها لينا احنا ننضفها ونسلمها ونعمل دا، يهمنا المقتنيات يتحافظ عليها في مكان يليق بيه، بصفته إيه ياخد الجوابات وبأي حق، فيه أسرار لعائلة أحمد، وصور وقصة حياته كان بيكتبها، بأي حق يتطلعوا على الحاجات دي، وأصلًا مش كل المقتنيات معاهم فيه حاجات معانا.
وتابعت شقيقة أحمد زكي: لازم تسليم المقتنيات كان يحصل في حضورنا إحنا أهله، إحنا عندنا حكم المحكمة ولصالحنا ولما عملوا استئناف اترفض، ليه محدش حاول يتواصل معانا، استنينا حد يتعاون معانا ويساعدنا نطمن ع مشواره الفني والمحامي تجاهلنا ولا عمل لينا اعتبار اللي بيحصل فينا دا كتير محدش يعرف حاجة عننا، وبيتقال حاجات كتير وبنتجاهلها إحنا اكبر من كدا.
وأردفت شقيقة الراحل: اللي عطلني إني كنت مصابة بكورونا وبقالي 5 شهور على جهاز تنفس ومكنتش بتكلم، ودلوقتي اتعافيت ولكن مطلعتش منها سليمة، وأخواتي حزنوا عشاني والوقت دا كله ماتحركناش ومش ساكتين ودلوقتي أقدر أكمل وأحافظ على اللي بدأناه، أنا مش عايزة ورث ولا طمعانة في أي حاجة، ساعدونا وعايزة كل شعب مصر يساعدني ويقولي فين مقتنيات أحمد زكي، مستعدة أتنازل عن أي قضية وأي حاجة لمجرد ما أطمن، وهقاضي كل شخص أتصرف فيها دون وجه حق.
