منة عرفة تعود لزوجها: ربنا يخليهولي.. وغلطتي إني شاركتكم حياتي الشخصية
أعلنت الفنانة منة عرفة، عودتها إلى زوجها، الممثل الشاب محمود المهدي؛ بعد أن أعلنا انفصالهما قبل يومين، معبرة عن استيائها الشديد من شماتة البعض، بعد إعلان الخبر.
وكتبت منة عرفة، عبر ستوري حسابها الخاص بتطبيق إنستجرام: من أصعب اللحظات اللي ممكن تعدي على أي ست، لحظة الانفصال وخراب البيت، الطلاق بيهتز له عرش الرحمن، لكن أنتم يمكن عشان بتسمعوا عن بيوت بتتخرب كل دقيقة؛ فبقى أبغض الحلال عليها، رهان بتعملوه مع بعض على إننا مش هنكمل، أو مادة خام للشماتة فينا.
وتابعت منة عرفة: خراب البيت عمره ما كان حاجة سهلة على الست أو على الرجل أو على أهالينا، في عز ضعفي وحزني وكسرتي، اللي ربنا ما يكتبه على أي ست، ما رحمتونيش، ولا قدَّرتوا إني في موقف لا أُحسد عليه، وشمتانين فينا، قد إيه أنتم ناس ما تعرفوش ربنا، ولا في قلوبكم رحمة.
وواصلت منة عرفة: اتمنوا الخير لبعض يا جماعة، بلاش نشمت في بعض، لكن دي غلطي أنا، إني شاركتكوا حياتي الشخصية، الإنسان بيغلط عشان يتعلم، وأنا اتعلمت، ربنا يعينكوا على نفسيتكم الجحيم دي، وعسى أن تكرهوا شيئا وهو خير لكم.
واختتمت منة عرفة الاستوري: يمكن الخلاف اللي حصل؛ كشف لنا ناس كتير حوالينا، كانوا بيمثلوا إنهم فرحانين لينا، بس الحقيقي إنهم كانوا مستنيين أول مشكلة؛ عشان يشمتوا في كسرتي وخراب بيتي، بس والله ربنا مش هينولهالكوا، وربنا يخلي أهلي وزوجي، والناس اللي بتتمنى لي الخير، ووقفت جمبي، وكلمة أخيرة للسادة الصحفيين، أرجوكم كفاية بقى، ارحمونا، حرام عليكم.
