محمد هنيدي عن مشهد خروجه من السجن بفيلم البطل: أحمد زكي قالي مثل بضهرك
روى الفنان محمد هنيدي، كواليس تصوير فيلم البطل، الذي قدم بطولته الفنان الراحل أحمد زكي، خلال حلقة برنامجه هنيدي شو، الذي يعرض عبر شاشة قناة المحور، باستضافة الفنان مصطفى قمر، والذي شاركه في الفيلم والعديد من الأعمال الفنية.
وقال هنيدي: أهم حاجة في فيلم البطل مينفعش نتكلم عليه من غير ما نذكر الفنان أحمد زكي، رحمة الله عليه، كنت المفروض إني هصور فيلم إسماعيلية رايح جاي، وبعدين قالولي في دور في فيلم البطل، وأنا مقرأتش الدور ولقيت إني بلعب دور ثوري وبقول شعر لبيرم التونسي، قولت هما الناس دول اختاروني ليه، قعدت أفتش في الورق إني أضحك الناس، كل ده قدام رهبة التمثيل مع الفنان أحمد زكي.
وكشف هنيدي، نصيحة النمر الأسود له في مشهد خروجه من السجن، قائلًا: كنا بنصور مشهد خروجي من السجن وكان بيتصور من ظهري، والأستاذ أحمد قالي ما تمثل يا محمد، قولتله أمثل إيه ده أنتم حاطين إيديكم عليا وأنا خارج من السجن.
وأضاف: قالي طيب ما تمثل بظهرك، هنا قولت الأستاذ شكله بيتريق عليا، قالي اللي خارج من السجن بيكون فرحان وعنده مشاعر، قولت ده الأستاذ عنده حق، وفعلًا كنا في مدرسة تمثيل، والأستاذ كان كل يوم يدخل بشخصية جديدة في اللوكيشين، مرة قالهم أنا هقلدلكم هنيدي.
