أقدم بائعة فول وطعمية بالدقهلية.. بقالنا 46 سنة بنشتغل والناس بتحب تاكل من عندنا |فيديو
قصة كفاح تشهدها قرية كفر عبد المؤمن التابعة لمركز دكرنس في محافظة الدقهلية، حيث يقف زوجان على عربة فول وفلافل منذ 46 عاما لكسب قوت يوميهم بالحلال، ويتوافد عليهما المواطنين من جميع أنحاء المحافظة ليأكل الفلافل من يد أم محمد.
والتقى القاهرة 24، بالسيدة أم محمد ورصدت قصة كفاحهما، قائلة: أنا متزوجة منذ تقريبا 50 عاما وفي البداية كنت ربة منزل وزوجي كان فلاح وعايشين في بيت عائلة ولكن بعد وفاة حماي، والورث أتوزع الظروف أختلفت وفتحنا المشروع ده للمساعدة في تربية الأولاد لأنه عندنا 4 أولاد بنتين وولدين الحمدلله جوزتهم كلهم حاليًا.
وأضافت السيدة: أنا كل يوم بصحي من بعد الفجر بجهز الشغل وأبو محمد بيخرج الشغل نبدأ نبيع للناس وبنشتغل كل يوم من الساعة 6 الصبح إلى 1 الظهر ومن بعد المغرب إلى 11 بليل بنشتغل في أجواء شتاء صيف ولكن بنشتغل أكتر في الشتاء.
وتابعت بائعة الفول: خلال الـ 46 سنة مرينا بظروف كتير، من حروق بسب الزيت وكان في ناس بتاكل مش بيقي معاها حساب بس الحمد لله ربنا بيكرمنا، ومواقف كتير المكان كان هيتحرق وربنا ستر، أبنائي وأحفادي بيساعدوني حتي حموات أولادي الحمد الله كل الناس بتحبنا.
وأكملت أم محمد: أنا الناس بتجيلي من كل مكان في الدقهلية والله مش عارفه بيعرفوني ازاي، أنا بعمل الفلافل بطريقة عادية والسندوتشات عندي بسيطة بس الحمدلله الناس بتحبنا وبتحب تأكل من عندنا.
واختتمت السيدة: بزعل جدًا لما بشوف الشباب قاعد من غير شغل.. أشتغل أي حاجة.. الإنسان مش بيحس بقيمته إلا لما يشتغل، أنا مش نفسي في حاجة أنا راضية بكل حاجة الحمد الله.
