بعد قرار إيقافه.. حمو بيكا: في ناس لا تصلح للغناء ومعاهم كارنيه النقابة
علق مؤدي المهرجانات الشعبية حمو بيكا، على قرار نقابة المهن الموسيقية، بمنعه من الغناء داخل مصر، بعدما رسب للمرة الثانية في اختبار لجنة الاستماع.
وقال حمو بيكا، خلال بث مباشر عبر حسابه الشخصي بموقع انستجرام: أولا أنا بشكر نقابة المهن الموسيقية في مصر لها مني كل احترامي، أنا النهاردة طالع بتكلم وأنا فرحان وسعيد، لأني بسمع قرار إيقافي بقالي 5 سنين، أنا اتعملي محاضر وقضايا كتير أوي، لما أنت توقفني أنا مش بقف لوحدي أنا معايا ناس كتير فاتحة بيوتها.
وتابع: في ناس كتير لا تصلح للغناء ومعاهم كارنيه النقابة، وفي المجال ومش عايز أقول أسامي عشان هما صحابي وأكلنا مع بعض عيش وملح، أنا بنزل أشتغل وبدفع تمن التصريح، تصريح الساحل كان بـ 15 ألف جنيه، وكنت بدفع وأقول حاضر عشان عايز أكل عيش، أي مسؤول في مصر لازم يقف معانا ويدعمنا، الشباب اللي نزل عليهم قرار الإيقاف عددهم كبير وفي ناس بتاكل من وراهم عيش.
وأضاف: سافرنا برا مصر وبيستقبلونا وبنعمل حفلات، لكن أنا عمري ما شوفت كده، مش بعد ما نخلي 100 مليون يسمعونا نوقف، إحنا ناخد رأي الجمهور، أي مسؤول في النقابة بنحترمكم وأستاذ هاني شاكر على دماغي ليكم كل التقدير والاحترام، اتكلمنا كتير وقولنا حد يقف معانا ومحدش وقف، بس في ربنا.
وفي سياق متصل، قال علاء عامر المستشار القانوني للموسيقيين، في تصريح لـ موقع القاهرة 24، إن حمو بيكا كان في نقابة المهن الموسيقية، قبل أسبوعين من الآن، ورسب في الاختبارات؛ ولذلك هو ممنوع من الغناء في مصر، لحين تقنين أوضاعه في النقابة.
وسبق أن أعلنت نقابة المهن الموسيقية، منع عدد من مطربي المهرجانات الشعبية، من الغناء في مصر؛ لعدم حصولهم على التصاريح اللازمة، وكان أبرزهم: حمو بيكا، حسن شاكوش، عنبة، عمرو حاحا، كزبرة وحنجرة، أحمد قاسم الشهير بـ فيلو، مصطفى زكريا الشهير بـ مسلم، مجدي شطة.
