كانت مشكلتنا في الأكل.. إلهام شاهين تكشف تفاصيل تعرضها للسرقة بـ فرنسا
روت الفنانة إلهام شاهين، تفاصيل تعرضها للسرقة، في أثناء سفرها إلى فرنسا، بصحبة صديقتها، الفنانة هالة صدقي، وذلك في الجزء الثاني من حلقة برنامج سهرانين، الذي يقدمه الفنان أمير كرارة، على شاشة قناة ON.
وكشفت شاهين، تفاصيل الحادث، بوصلة من الضحك، قائلة: هي هالة صدقي فضحتني وحكت؟، القصة وما فيها، هالة مش منظمة، ومش بتحط الحاجة في مكانها، وكنا سافرنا فرنسا، وقاعدين في أوضة سوا؛ عشان نوفر فلوس، المهم أنا عاملة نفسي ناصحة وبشيل كل حاجة معايا.
وتابعت إلهام شاهين: وفي يوم كنا نازلين نعمل شوبينج، أخدت فلوس وأخدت الفيزا بتاعتها، وقولت لها مش قلقانة أحسن ما تقع منك؟، المهم، دخلنا المحل، وكان عامل تخفيضات، واشترينا حاجات كتير جدا، وجيت أحاسب؛ لقيت الشنطة مفتوحة، ولقيت المحفظة اتسرقت، ومفيش معانا لا فلوس ولا فيزا.
فيما قالت هالة صدقي: قابلنا سناء منصور وإيناس الدغيدي هناك، ورغم إنهم أصدقائنا؛ اتكسفنا وما قولناش، وكانوا حابين يعزمونا على بيتزا؛ وقلنا كويس، أهو نوفر وجبة، ولكن لقيت إلهام مصممة إنها تدفع، وتقولهم أنتوا ضيوف عندنا، وأبص لها وأقولها خلاص، هما مصممين، ودي لا يمكن، واضطرينا نعزمهم.
وأضافت إلهام شاهين: المهم هالة صدقي كان معاها شوية فلوس قليلة في الأوضة، وكانت مشكلتنا كلها في الأكل؛ لأن كده كده حاجزين تذاكر الطيران للعودة، فأنا بحب جدا الكريز، وكل يوم باكل كيلو وأنا سهرانة قدام التليفزيون، فقولت لها يا هالة، هاتيلي كيلو كريز؛ راحت قايلالي هو ربع كيلو مفيش غيره.
