هاني شاكر يرد على نجيب ساويرس: نفسنة من مين هو أي تقليل من قيمة الناس المحترمة وخلاص؟
علق الفنان هاني شاكر نقيب المهن الموسيقية على قرار النقابة بمنع 19 مطرب مهرجانات شعبية من الغناء، ذلك الأمر الذي أثار جدلًا واسعًا بينه وبين رجل الأعمال نجيب ساويرس، وعدد من رواد مواقع التواصل الاجتماعي خلال الساعات الماضية.
وقال هاني شاكر خلال مداخلة هاتفية ببرنامج التاسعة مع الإعلامي عمرو أديب المذاع على شاشة mbc مصر، ردًا على رجل الأعمال نجيب ساويرس: نفسنة من مين؟ هنفسن من كزبرة وحنجرة على إيه؟ هو أي تقليل من قيمة الناس المحترمة وخلاص؟ أنا لا أقبل هذا الكلام.
وأردف أمير الغناء العربي: مايشرفنيش أسمع الأصوات دي واللي بيسمع هاني شاكر استحالة يسمعهم، أنا قدمت مراحل كبيرة في حياتي وحتى لو عملت أغنية في إيقاع أو رتم لازم يبقى فيها معنى.
وأضاف شاكر: دي مش حرية إبداع ولا حرية رأي، فما كان منا غير بلاغ الجهات المعنية الناس دول مش عندنا في النقابة احنا لا سمحنا ولا منعنا، أنا دوري أحافظ على أعضائي، ومينفعش يبقى الرئيس السيسي رئيسنا ويبقى ده الفن اللي يتقدم في مصر في الجمهورية الجديدة، وده دور النقابة والرقابة وفيه تنسيق بينا مينفعش عضو عندي يقل أدبه.
وتابع الفنان الكبير: حمو بيكا امتحن وسقط وخلاص مبقاش له علاقة بالنقابة، ونفسي يسمعوا الأستاذ حسن شاكوش قال إيه على المسرح، ده يعتبر واحد سقط والتاني عمل فعل فاضح، بنحافظ على قيمنا والقانون واحنا مش فاتحينها للمؤديين.
