الجوكر يعتذر عن إلغاء حفله بمسرح الزمالك: اللي جاية هتكون مجانًا
اعتذر مطرب الراب أحمد ناصر، والمعروف بـ الجوكر، عن إلغاء حفله أمس بمسرح الزمالك، وذلك بسبب حدوث مشكلة مفاجئة في الكهرباء.
وكتب الجوكر على حسابه الشخصي بـ فيسبوك: أنا بعتذر جدًا لكل الناس اللي جت النهاردة عشان تحضر حفلتي في مسرح الزمالك، اللي حصل النهاردة كان لظروف خارجة عن إرادتي تمامًا، كان في مشكلة في الكهرباء من عند المسرح وانتظرنا كتير إنهم يحلوها وللأسف مفيش حاجة اتحلت.
وتابع الجوكر: هفضل دايمًا مهتم إن أي حفلة أعملها تكون حاجة تليق بيكم، عشان كدة بعد أسبوع هنعلن عن ميعاد حفلة تانية في مكان تاني، وكل الناس اللي جت حفلة النهاردة، مدعوة لحضور الحفلة الجاية دون مقابل.
حفل مجانًا لـ الجوكر
وأضاف الجوكر: والحفلة اللي جاية دي مش هتكون بدل حفلة النهاردة، الحفلة اللي جاية دي احنا هنتكفل بدخول الناس اللي جت حفلة النهاردة فيها مجانا تعويضا ليهم عن موقف احنا ملناش ذنب فيه، ومستفدناش منه أي حاجة.
وأشار: تمن تذاكر حفلة النهاردة ياريت تتواصلوا مع مسرح الزمالك مباشرةً عشان تستردوه، وأخيرا حابب أشكر ضيفي المحترم إيفيل، وأشوفكم قريب.
