حمو بيكا: مصر مش أم كلثوم وعبد الحليم بس.. وفيه ناس أصوات لا تصلح ومعاهم كارنيه النقابة
واصل مطرب المهرجانات حمو بيكا، هجومه على نقابة المهن الموسيقية، بعد صدور قرار بإيقافه عن إحياء الحفلات، وسقوطه للمرة الثانية في اختبارات لجنة المستمعين بالنقابة.
وتابع حمو بيكا في بث مباشر على حسابه الشخصي بـ انستجرام: مصر بتاعت كل مصري مش أم كلثوم وعبد الحليم بس، أي حد يحمل هوية مصرية فهي بلده، ليه نغني برا مصر، هي اتعملت ليكم أنتم بس، العصر بتاعكم عدى وفات، وفي التقييم بتاع اليوتيوب احنا مكتسحين، مفيش غير تامر حسني وعمرو دياب وحماقي والباقي كله مهرجانات.
وأضاف حمو بيكا: بدل ما أنتم قاعدين تعملوا ندوات وخاربين الدنيا، سيبوا الناس تشتغل، ما احنا قعدنا 3 سنين أيام كورونا مكنش فيها شغل وقعدنا في بيوتنا، سيبونا ناكل عيش، ربنا اللي بيرحم ولازم يا عبد أنت كمان ترحم، في ناس أصواتها لا تصلح وحملوا كارينه النقابة.
وأضاف: قولولي الناس دي غنت إيه وأنا هغني زيهم، زي ما حليتوا مشكلة الراب وقيمتوه حلو مشكلة المهرجان وأعملوا لينا شعبنا وخدنا تحت باطك وحط قواعد واللي يخالفها حاسبه وخرجه، بقالي 5 سنين بعاني واتعملي قضايا وهاني شاكر يشكر اتنازلي عن القضية، ولكن كفاية ظلم.
وفي وقت سابق، أصدرت نقابة المهن الموسيقية بيانًا أعلنت من خلاله إيقاف عددًا من مطربين المهرجانات، وأبرزهم: حمو بيكا، حسن شاكوش، حمو طيخة، مسلم، عنبة، الزعيم.
