بسمة وهبة: لطمت لما سمعت أغنية عفاريت الأسفلت لويجز
أعربت الإعلامية بسمة وهبة، عن تخوفها الشديد من تأثير أغاني الراب على الجيل الجديد، لما تحمله هذه الأغاني من معاني وإحاءات خادشة للحياء كما أشارت، حيث أنها صدمت عند سماع القليل منها.
وقالت وهبة خلال حلقة برنامجها 90 دقيقة المذاع عبر قناة المحور: للأسف كل الجيل اللي بيسمع الراب جيل الولاد الصغيرين، طب دول هيطلعوا بنربيهم على إيه؟
كل الكلمات اللي في أغاني الراب عن الجنس والمخدرات، وكل الأغاني مليانة إحاءات جنسية، والمطرب ماسك طبق بيلف مخدرات، أنا مقدرتش أنزل ده.
وتابعت: أنا لطمت لما سمعت أغنية عفاريت الأسفلت، أنا مش عايزة أعملها دعوة للأسف بس دي مهزلة، أنا عايزة السادة المشاهدين المحترمين يدخلوا يشوفوا أغنية عفاريت الأسفلت، ونازلة على اليوتيوب عادي وأحكموا بنفسكوا، يمكن أنا غلطانة، يمكن أنا أطلع أوفر، أنا بتقبل ثقافة الاختلاف وبقبل لما أكون غلطانة بطلع وأقول أنا غلطانة، وهل أنا غلطانة النهاردة؟.
وأضافت موجهة رسالة لنقيب المهن الموسيقية الفنان هاني شاكر: أنا برجوك وبتوسل إليك يا أستاذ هاني شاكر، أرجوك شوفلك حل في أغاني الراب دي، وبلاش تعلن حبك وإعجابك لهذا اللون من الأغاني، لأنك قدوة وكل الناس هتمشي وراك، بعض أغاني الراب لا يقل خطور في الأسفاف عن بعض الأسفاف اللي في أغاني المهرجانات اللي برضوا بنرفضه، بكل حب وهدوء، بطلب منك بكل حب تشوف حل.
