ممكن أكلم تامر حسني؟.. رقم موبايل مزيف يخدع محمد عطية
شارك الفنان محمد عطية جمهوره، بموقف له مع المطرب تامر حسني، في فترة الثانوية العامة، عندما كان عطية مهتما بتأليف وتلحين الأغاني، وكان تامر في ذلك الوقت في زيارة لمدينة طنطا لتصوير أحد البرامج، فذهب عطية بشغف لمقابلة تامر حسني ومعه كلمات أغنيتة ليعرضها عليه، لكنه لم يستطيع مقابلته.
وكتب محمد عطية، عبر حسابة الشخصي على موقع تبادل الصور والفيديوهات القصبرة انستجرام، قائلًا: وانا فى تانية أو تالتة ثانوى تقريبا كان تامر حسنى لسه منزل أغنية حبيبي وأنت بعيد، وكانت الأغنية مكسرة الدنيا، وانا كنت بحب تامر جدا ولازلت بحبوا، وعرفت في يوم من أحد الأصدقاء إن تامر جاى عندنا طنطا عشان يستضيفوه فى القناة السادسة، وانا كنت معروف وسط أصحابى إنى بكتب وألحن، وساعتها مكنش فيه سوشيال ميديا، فقررت أروح القناة عشان أقابله واسمعه أغنية أنا كنت كاتبها وملحنها وكل اللي أعرفهم ساعتها قالولي حاول تسمعها له.
وتايع عطية: المهم روحت وبعد زن وإنتظار، حد من اللي في القناة ادانى رقم تامر وقالى كلمه سمعها له، مشيت وانا في قمة السعادة وتانى يوم نزلت علي كابينة ميناتل واتصلت بالرقم رد عليا واحد وقلتله ممكن اكلم تامر حسنى، قالى انا مدير اعماله وشرحتله الموضوع، فقالى انا بسمع الاغاني وبختارها له، وبعد ما سمعتوا الأغنية قالي هرجع أكلمك.
وأضاف: فضلت اكلمه علي مدار اسبوعين يوم اه ويوم لا، لحد ما اكتشفت إن ده مش رقم تامر، وان الراجل اللي في القناة كان بيشتغلنى، وبعد ستار أكاديمي اتعرفت علي تامر وشوفت بعيني إنه جدع جدا وبيساعد اي حد موهوب، بس عمرى ما افتكرت احكيله القصة دى، وكنت ناسيها تمامًا لحد النهاردة وانا بقلب في الورق لقيت الاغنية، طبعًا الكلام كان ناقصه خبرة وكان من عشرين سنة تقريبًا بس حابب اشاركم معايا الكلمات.
ونشر بعض من كلمات الأغنية وهي: وبتقولولى إرجعلها، بتفكرونى بحبها، دا انا ياما نزلت دموعي منها، وعايوة ترجع، ومصدقينها؟، لأ صدقوني ده مش حنينها، ده غرور ومالي قلبها، وبتقولولي إرجعلها، سيبوني وحدي مرتاح ضميري، انا كده راضي في بعدي، زي ما كان في قبلي غيري، هيكون أكيد في برضو بعدي، لا انا أول حبايبها، ولا أخر حبايبها، ومش شوقها اللي جايبها، جاية تكمل كدبها، وبتقولولي إرجعلها.
