محمد يسري يروي موقفًا لـ رشوان توفيق في جنازة والده: ربنا طبطب على قلبي من خلاله
حرص الفنان الشاب محمد يسري، على دعم رشوان توفيق بعد أزمته الأخيرة، حيث ذكر يسري موقفًا للفنان رشوان توفيق في أثناء جنازة والده الفنان إبراهيم يسري.
وأوضح يسري أن رشوان توفيق حرص على حضور جنازة والده على الرغم من بُعد مدافن العائلة، وكان متأثرا لوفاته لدرجة البكاء.
وكتب محمد يسري عبر حسابه بموقع التواصل الاجتماعي فيسبوك: أبويا الله يرحمه لما اتوفى أنا ماكنتش فاهم حاجة خالص.. يمكن الناس اللي مرت بالموقف هي اللي هتبقى فاهمة أوي أنا قصدي إيه بس أنا ماكنتش أنا.. والحقيقة إني مارجعتش أنا.. بس وقتها أنا ماكنتش أنا فعلا ماكنتش مستوعب، ماكنتش فاهم وكان ربنا هو اللي بيلهم جسمي إنه يتصرف.. ده كان إحساسي وقتها.
وتابع: في وسط التكفين والصلاة والدفنة الواحد بيبقى بجد في حتة تانية خالص لدرجة أن في تفاصيل أنا باسمعها من ناس كانت معايا وقتها كأني باسمعها لأول مرة.. اللي باحاول أقوله إن في تفاصيل كتير أوي ممكن الواحد ينساها في الوقت ده من كتر ما دماغه بتبقى في الابتلاء اللي هو فيه.. لكن حاجة من الحاجات إلى عمري ما هنساها يوم دفنة أبويا الله يرحمه كان الأستاذ الكبير رشوان.
واستكمل يسري: أبويا اتوفى في 2015 وعلى الرغم من إني دائمًا حاسس أن ده كان من عمر بحاله لكن الحقيقة أن 2015 دي من 6 سنين، وإحنا مدافن العيلة في طريق الواحات يعني بكل المقاييس مشوار، متخيل أنه أكيد قاسي ومتعب بالذات على حد سنه كبيرة… لما كنت باخد العزا في المدافن فجأة لقيت الأستاذ رشوان توفيق داخل علينا ومعاه حد جنبه بيساعده فكلنا اتحركنا عليه عشان نجيبله كرسي ويقعد وهو مصمم أنه هو يخش لأبويا وقعد يحضني ويطبطب عليا ويقولي إبراهيم ده ابني وهو بيعيط وبيحكيلي عن أبويا وأد إيه هو بيحبه.
وأضاف: الحقيقة أن أنا للأسف ماشفتش الأستاذ توفيق في حياتي غير 4 مرات مثلا.. منها المرة دي.. يعني ماقدرش أقول إنه كان من أصدقاء أو أساتذة أبويا القريبين منه مثلا.. لكن ده كان إحساسه بيه وهو في الآخر في الحقيقة لا ابنه ولا قريبه حتى.. وربنا عالم أد إيه الموقف ده، رغم إنه ممكن ميبانش أد إيه تأثيره كبير، لكن الحقيقة إنه حاجة من الحاجات إلِّى هفضل دائما شاكر ليها في الوقت ده لأني مؤمن إن ربنا طبطب على قلبي من خلال الراجل ده.
واختتم يسري: تخيلوا رجل زي ده عامل إزاي مع عيلته.. ربنا يكرمك ويحبب فيك خلقه ويديك طولة العمر والصحة والستر يا أستاذ رشوان وتفضل معانا بـ فنك وبـ إنسانيتك.
أزمة رشوان توفيق
وأثار الفنان رشوان توفيق تعاطف جمهوره بعدما صرح بأن ابنته قامت برفع قضية حجر ضده بتعليمات من زوجها وحفيده، وتلقى رشوان توفيق دعما من قبل عدد كبير من الفنانين والإعلاميين في مصر.
