هاني شاكر لمؤدي المهرجانات: قلبي بيتقطع وبحاول أحمي أطفال الأمة العربية كلها وبلاش عِند
تحث الفنان هاني شاكر، نقيب المهن التمثيلية، عن أزمة مطرب المهرجانات الشعبية عمر كمال، الذي تم إحالته للتحقيق بعد تصرفات المُطرب الشاب عمر كمال في حفله بموسم الرياض، حيث استبدل جُملة في أغنيته الشهيرة بنت الجيران، وهي جُملة هشرب خمور وحشيش بـ هشرب تمور وحليب، كما قال عمر حينما سُئل عن سر تغيير تِلك الجُملة قال: أنا واقف على أرض طاهرة.
وقال شاكر، خلال مداخلة هاتفية ببرنامج آخر النهار، الذي يقدمه الإعلامي تامر أمين، عبر شاشة قناة النهار: إحنا من الصبح كم المناشدات من ناس عادية وصحفيين وناس على قدر كبير من الثقافة والإحساس بقيمة الكلمة، قالوا لازم النقابة تحقق في الموضوع ده ونشوف قال كده وقال كده ليه؟ إحنا كل أراضينا مقدسة وطاهرة، وكل واحد فينا بيضحي بحياته عشان وطنه، يعني إذا أنا كنت بمنع من البداية لخطورة إني أحط خمور وحشيش في وسط غنوة ناجحة عشان ولادنا، وزي ما قولت في كل مكان لما ألاقي فيديو لأولاد في الحضانة والله 5 سنين و6 سنين و7 سنين، ومشغلين ليهم في الحوش بنت الجيران وخمور وحشيش، أنا قلبي بيتقطع الصراحة.
وتابع موجها رسالة لـ عمر كمال: طب لما أنت عارف إن ده غلط واحترمت المكان اللي أنت بتغني فيه وطهارة الأرض، يعني أنت عارف إن توجهنا ليك عشان أنت من الأول غلط، طب أنا لما بمنع ده أنا بمنعه بس عن مصر؟ أنا لما نبهتهم في الأول يا ولادنا بلاش خمور وحشيش الغنوة ناجحة لوحدها، غيروها بأي حاجة ومتقولوهاش في أي حتة، أبص ألاقيهم بيغنوها في كل مكان؟ يعني إيه العند ده.
وأضاف أمير الغناء العربي: هو أنا بحمي أطفال مصر بس؟ أنا بحمي أطفال الأمة العربية كلها، معلش مع احترامي، لأن ده هيتسمع في كل البلاد العربية مش بس في مصر، كنت أتمنى إن مصر تكون عند عمر كمال زي السعودية، وجمهور مصر زي جمهور السعودية، وأرض مصر زي أرض السعودية.
