هاني شاكر بعد إحالة عمر كمال للتحقيق: عقابك كبير والغلط المرة دي في مصر وهيتم وقفك
عبّر الفنان هاني شاكر، نقيب المهن الموسيقية، عن استيائه الشديد من إساءة عمر كمال لمصر في تعليق منسوب له عبر صفحته، يكشف سبب تغييره كلمات أغنية بنت الجيران واستبدال مقطع أشرب خمور وحشيش إلى أشرب تمور وحليب في حفله بالسعودية ضمن فعاليات موسم الرياض الترفيهي.
وقال هاني شاكر، في مداخلة هاتفية مع الإعلامي أحمد موسى في برنامج على مسئوليتي المذاع عبر قناة صدى البلد: كلام عمر كمال استفزينا كلنا لأن إحنا اهتمامنا كلنا نمنع أي كلام خارج عشان ولادنا وولاد الأمة العربية كلها، وبحافظ على الأجيال اللي جاية ما ينفعش هنا نقول كلام وأطلع بره أقول كلام تاني، وكل بلد في الدنيا أرض طاهرة ومقدسة أمال بنضحي ببلدنا وشبابنا ليه لو هي مش مقدسة.
وطالب الفنان هاني شاكر الدولة بالتدخل ومساعدة النقابة في تقنين أوضاع الموسيقى في مصر، من حيث إنتاج الأغاني وأيضًا الأفلام والمسلسلات والمسرحيات؛ لأنها تعبر عن انطباع جميل وشهامة الفنان المصري.
واستكمل: قانون الضبطية القضائية هيساعدنا كثير على مواجهة الظاهرة السلبية، والبرلمان سيساعدنا ومقدر الدور الذي نلعبه.
وأردف الفنان هاني شاكر: بشوف بنات بتغني أغاني على يوتيوب وتيك توك تودي في داهية، إحنا رايحين فين بولادنا، والناس اللي بيقولوا هاني شاكر بيتلكك، اللي بيعترضوا وهما مش فاهمين حاجة يا ريت يساعدونا نعيد للفن رونقه وقيمته.
وأشار إلى أنه شعر بالصدمة من موقف عمر كمال، مضيفًا: الناس بتكلمني ومش مصدقين إن مصر يتقال عليها الكلام ده هو فعلا كل واحد فينا أرضه غالية عليه ومقدسة بالنسبة له، زي ما بتعامل السعودية عامل كل الدول العربية.
وأكد أنه سيتم التحقيق مع عمر كمال غدًا بعد عودته إلى مصر: عمر كمال اتبلغ وعنده تحقيق بكرة أول ما يوصل ويثبت للجنة قال كده ولا لأ لو قال فيها عقاب كبير، هيكون وقف وهنشوف اللجنة هتحقق وتقول إيه، والغلط المرة دي في بلدي مش في شخصي.
واستكمل: المحامي سمير صبري رفع قضية وقدم بلاغا ضد عمر كمال قدام محكمة الجنايات لأنها إهانة لسمعة البلد.
