السيسي: والدتي علمتني التجرد وكانت شديدة الحكمة ووالدي شديد الهمة
قالت الطفلة ملك، من ذوي الهمم، في فقرة حوار مع الرئيس، خلال احتفالية قادرون باختلاف اليوم، بحضور الرئيس عبد الفتاح السيسي، إنها بطلة مصر للسباحة.
وأضافت ملك موجهة حديثها للرئيس: أنا اسمي ملك محمد، 9 سنوات، وبطلة مصر في السباحة، وباتعلم بيانو، وباغني وباحب التمثيل والتأليف، باغني في دار الأوبرا المصرية، وأنا مبسوطة بوجودك معانا.
وسألت الرئيس قائلًا: مين مثلك الأعلى؟، ليرد السيسي: سؤال مهم أوي، دايما الناس في السؤال ده بيقولوا فلان، أنا عندي نماذج كتير من الناس، ماخدتش حد لوحده، أول نموذج ليّ كانت أسرتي، اللي أتربيت فيها والدي ووالدتي.
وتابع: والدتي كانت سيدة شديدة الحكمة والصبر، يعني مش عاوز أكون منحاز إني مشوفتش حد زيها، لكن هي علمتني التجرد، يعني أشوف الأمور بمعيار بعيد عن الهوى والانحياز والتمييز، أول ما علمتني كده، وكبرت بقيت أحكم الأمور وأوزنها بالتجرد، ملقتش أعز منها ولا أحكم منها.
وواصل الرئيس: والدي كان شديد الهمة، يعني بيشتغل من الفجر، وهو كان ميسور، مكانش بيشتغل عشان يتحصل، بس لكن كان بيحب العمل، وفي أمثلة كتيرة أوي، عمي كان شديد الكرم، وشديد الرفق بالناس، ولم أر في حياتي نموذجا كريما جدا مع الأطفال مع البنات مع الضعاف زيه، ده عمي، وأخدت ده منه.
واستكمل: أنا ماخدتش نموذج لوحده، أنا اتعلمت من محيطي، وهما كلهم عند ربنا، وأتمنى من الله يجازيهم خير.
وقالت ملك: أنا مثلي الأعلى طه حسين، عشان تخطى كل الظروف والصعوبات، وهو كان كفيف وكبر وحقق حلمه، ولما أكبر هكون وزيرة الثقافة.. ورد الرئيس قائلًا: ممكن تكوني وزيرة الثقافة بتاعة سنك من غير ما نشيل حد.
