ياسمين عبد العزيز: أصيبت بثقب في القولون وتسمم بالدم.. وقالوا لو اتأخرت عن العملية ساعة هموت
كشفت الفنانة ياسمين عبد العزيز تفاصيل أزمتها الصحية التي تعرضت لها خلال الفترة الماضية، حيث تعرضت لخطأ طبي في أثناء خضوعها لعملية استئصال أكياس من المبيض تسمى بأكياس الشيكولاته، التي سافرت على إثر هذا الخطأ لسويسرا لاستكمال رحلة العلاج.
وقالت ياسمين عبد العزيز، خلال حوارها مع الإعلامية منى الشاذلي ببرنامج معكم على شاشة قناة CBC: روحت أعمل العملية لدكتور قالي هتاخد ساعتين ونص وهتعدي يومين أو ثلاث أيام، وروحت عملتها وكان معايا أحمد وبنتي وصاحبتي، عملت عملية الأكياس دي وكان في عملية تانية في نفس لوقت، طلعت من العملية في ألم رهيب وفضلت أقولهم أنا بموت وهما شايفين إني لازم أقوم وأمشي، في الوقت ده الدنيا كان كل الناس مضايقة وفي تفاصيل كتير مش فكراها، كنت باخد كمية مسكنات رهيبة ومفيش حاجة مأثرة فيا، واللي حواليا مفكرين إني بدلع لأني حمولة.
وتابعت ياسمين عبد العزيز: بعد كده قالوا لو مدخلتش أعمل العملية كمان ساعة هموت، المهم طلع إن كان القولون عندي مخروم وجالي تسمم في الدم وأنا بموت، وقالولي لو مدخليش العملية كمان ساعة هتموتي، الدكتور عصام شلباية هو اللي أنقذ حياتي، لازم أقول إن زي ما في الوحش كمان في الحلو، قالي وأنا داخل العملية كنت عارف إنك خلاص، قالي الموضوع كان صعب جدا وأنا داخل والدنيا كانت بايظة خالص، وأنا داخلة العملية أنا نفسي كنت حاسة إني مش هطلع، أنا فعلا مُت.
