هسافر يا ماما وأبنيلك قصر.. أم تحكي مأساة مصرع 3 من أولادها في 3 ساعات
تعيش منى أحمد مأساة حقيقية بعد وفاة أطفالها الثلاثة في أقل من 3 ساعات، بسبب تساقط الأمطار على منزلها، مما تسبب في سقوط العقار بأكمله على الأطفال.
كانوا حاسين كان دايما يقولي يا ماما أنا هسافر وهبني قصر واحد ليكي وواحد لتيتة وواحد لخالي.. هكذا تحدثت الأم المكلومة عن حياة أطفالها قبل أن يرحلوا سويًا من الدنيا.
تقول منى خلال حديثها مع برنامج واحد من الناس، المذاع عبر فضائية الحياة: قبل الحادثة بيوم لقيته بيقولي الميس في المدرسة عرفنا الصراط وأنا همسك بإيد تيتا لحد ما نوصل الجنة وقالي وإنت كمان يا ماما.
وأضافت: قبل الحادثة روحنا قرأنا الفاتحة لوالدي، وقلت لابني يا مروان يبقى تعالى لما نموت واعمل كدة، راح قالنا أنا مش هاجي لكم أنا هاجي لجدي لوحدي.
تتابع الأم: ربنا ليه حكمة وأنا مش عارفاها دلوقتي وبقول الحمد لله، لأنهم سايبين ذكريات حلوة معانا، وعمرهم ما قلوا أدبهم على حد، بس أنا بدور عليهم لحد الآن، ولما حد يقول لقينا طفل ببص بقول يمكن ابني، وبعدين بقول الحمد لله إني عارفة مكانهم.
وأكملت الأم: مشوفتش الجنازة بتاعتهم، بس الناس حكوا لي بعدين إني لبست فستان أبيض وطرحة بيضاء.
فيما تروي الجدة ليلى، آخر حديث دار بينها وبين الابن الأكبر صاحب الـ 9 سنوات قبل وفاته بدقائق: آخر حاجة وأنا داخلة أتوضى للمغرب، فقلت لمحمد أنت كبرت، وهو قالي لما تيتة تموت هحط لمبة في الضلمة جنبها، عشان متخافش.
