بعد واقعة «مهرجان شيماء 2» في شوارع الدقهلية.. والدة أحد الشباب: خدوني مكانه وطلعوه
كشفت والدة عماد الزلفي الشاب التي قام بتصوير " كليب شيماء2 “ تفاصيل وكواليس التصوير للقاهرة 24 قائلة: أنا ابني بيعمل في مجال التصوير وهو في 3 إعدادي وبيشتغل وبيصرف علي نفسه، ويوم التصوير الظهر قالي أنا نازل شغل مع صحبي، أنا مكنتش عارفة إنه نازل لتصوير الكليب ده، لو كان عندي علم كنت منعته، وبعد التصوير رجع المنزل دون قول أي شيء عن الكليب، وبعد ذلك انتشرت الصور والفيديوهات على السوشيال ميديا.
وأضافت والدة الشاب: وبعد ذلك بكلم ابني للاطمئنان عليه رد قالي أنا في قسم الشرطة حتي أفهم الوضع القانوني وبدأنا نكلم الناس اللي نزلت الصور والفيديوهات ونطالبهم بالحذف وفعلًا الناس بدأت تحذف، وبعض الناس رفضت وأصبحت الصور علي جميع مواقع التواصل الاجتماعي وابني من ساعتها محبوس.
وتابعت والدة عماد الزلفي: أنا ابني غلط في تصوير الكليب ولكن ليس معناه إني هموته لأن ده ظلم أيضًا، هو ابني نازل ياكل عيش، وكل تعليقات الناس على السوشيال ميديا مؤذية نفسيًا، ومن يوم حبسه وأنا ولا بأكل ولا بشرب بحاول أعيش اللي ابني بيعيشه داخل الحبس.
واختتمت والدة الشاب: أنا بستغيث بكل المسؤولين، برئيس الجمهورية ووزير الداخلية، خدوني مكانه بس هو يطلع كده خلاص أخذ جزاءه حرام ده شاب صغير نضيع مستقبله علشان فيديو.
وقرر المستشار مصطفى عبد المنعم رئيس نيابة السنبلاوين، والمستشار علاء السعدني، المحامي العام لنيابات جنوب الدقهلية، حبس الشابين أصحاب الواقعة بتهمة سوء استخدام وسائل التواصل الاجتماعي، 4 أيام على ذمة التحقيقات.
