محمد ممدوح: في دماغي مشروع سيحدث طفرة في المسرح المصري
كشف الفنان محمد ممدوح، أنه يعمل خلال الفترة الحالية على التحضير لمشروع مسرحي كبير، موضحا أنه سيحدث طفرة في تاريخ المسرح المصري.
وقال الفنان محمد ممدوح، خلال لقائه في برنامج التاسعة، الذي يقدمه الإعلامي يوسف الحسيني، عبر قناة الأولى المصرية: أنا عايز حاجة مبهرة ومتطورة، مش عايز أطلع أعمل مسرح بنعمله بقالنا زمن طويل، مش أنتوا عايزين نقلة مسرح؟ يلا نعمل نقلة مسرح بجد.
وتابع الفنان محمد ممدوح: في دماغي مشروع كده أنا وأصدقائي، بس محتاجين مساحة زي مساحة جراج الأوبرا نقدم فيها المسرحية بتاعتنا، هتحصل بإذن الله وورقنا بنكتبه، وبنكتبه براحتنا جدا وعلى مهلنا، وأهم المشاركين أحمد عز السيناريست، اللي كتب مسلسل قابيل والكبير أوي، هو صديق عمري من ثانوية عامة، هو وشلتي أصدقائي.
كما قال الفنان محمد ممدوح، خلال الحلقة إنه تأثر بالعديد من الفنانين بمختلف الأجيال، موضحا: حقيقي دون مجاملة هما كتير اللي خلوني أشوف الأفلام وأفكر فيها بشكل مختلف، زي الأساتذة عبد الله غيث، ويحيى الفخراني، وأحمد زكي، ونور الشريف، أنا اتعلمت من كل حد حاجة، وفهمت يعني إيه رسالة، حتى لو قدمت فيلم كوميدي، الضحك رسالة إني أقعد أتفرج وأتبسط.
