بحجة لم الشمل.. سيدة استدرجت طليقها وأنهت حياته بـ 3 طعنات في المعصرة | فيديو
شهدت منطقة المعصرة بمحافظة القاهرة، جريمة قتل بشعة ارتكبتها سيدة مطلقة بحق طليقها، البداية كانت عندما استدرجته إلى إحدى الشقق السكنية؛ بحجة الرجوع ولمّ شمل الأسرة مرة أخرى بعد انفصالهما، ثم طعنته عدة طعنات في الصدر والرقبة والظهر، حسب رواية والدة الضحية.
قالت والدة محمود ضحية المعصرة، لـ القاهرة 24: كنا بنفرش شقته علشان هيتجوز فيها كان هيدخل على طول، وبعدين اتصلت بيه طليقته قالتله تعالى علشان نرجع لبعض هو مكنش عارف إنها هتقتله.
وأضافت والدة الضحية: خطيبته اتصلت عليا وهيا منهارة في التليفون وبتقولي إلحقيني يا ماما أنا اتصلت بـ محمود وإللي ردت عليا طليقته. قولتها إزاي دا عامل لها بلوك ومش بيكلمها بقاله فترة كبيرة.
وتابعت: بعدها نزلت أجري في الشوارع زي المجنونة أدور عليه مكنتش عارفة هو فين، وأنا راجعة لقيت المباحث بيسألوني بتدوري على مين قولتلهم ابني محمود، في الوقت ده مكنتش أعرف إنه اتقتل غير تاني يوم الصبح.
وطالبت والدة ضحية المعصرة بمحاكمة المتهمة بأقصى عقوبة: ابني اندبح من طليقته من غير رحمة، أنا مش عايزة غير القصاص العادل.
في السياق ذاته قال نادر صاحب العقار الواقع به جريمة القتل: إنه أجّر شقته للسيدة عدة أيام بغرض الإقامة لدواعي السفر، لكنه عاد ليأخذ متعلقاته الشخصية من الشقة وفوجئ بالجريمة.
وحول اكتشافه الجريمة وطريقة تصرفه قال نادر في حديثه: رجعت آخد الحاجة بتاعتي من الشقة بعد ماسلمتها للست قالتلي أنا مش موجودة في الشقة دلوقتي تعالى خدها بكرة وروح دلوقتي عشان بنات أختي نايمين جوه فمتدخلش عليهم.
واستكمل نادر حديثه عن اكتشافه للجريمة وقال: فضلت أخبط على باب الشقة محدش بيرد روحت فاتح الباب وداخل لقيت الضحية قاعد بوضع الصلاة وغرقان في دمه روحت اتصلت بالنجدة وعملت بلاغ ضد الست القاتلة وادتهم بياناتها، ويذكر أن السيدة اعترفت بارتكابها للجريمة بمجرد مثولها أمام النيابة.
