مشروع تخرج تحول لحملة توعوية.. طلاب يطلقون مبادرة للترويج للسياحة العلاجية لكبار السن
أطلق طلاب بكلية الإعلام، جامعة أكتوبر للآداب والعلوم الحديث، حملة توعوية من أجل التعريف بالسياحة العلاجية لكبار السن، وذلك خلال مشروع التخرج بالكلية.
ريهام القط، نيفين رفعت، علي علاء وعمرو عماد، 4 طلاب بقسم الدعاية والإعلان بكلية الإعلام، دشنوا مبادرة لتوعية كبار السن بالسياحة الاستشفائية في مصر، وتعريفهم بهذه الأماكن.
أماكن السياحة العلاجية
وتقول ريهام لـ القاهرة 24: بعد دراسات وأبحاث كتير، قدرنا نوصل لأماكن زي سيوة، سيناء، سفاجا، العين السخنة، أسوان، الغردقة، الفيوم والواحات، وعملنا مقابلات مع أطباء هناك، ولقينا إن الأماكن دي بتعالج أمراض كتير، أشهرها العظام، التنفس، الهضم، النفسي والجلدية.
فيما توضح نيفين، أحد أعضاء المشروع، سبب اختيار تلك الفكرة بالتحديد، فتقول: إحنا لما كنا بنبحث في مشاريع التخرج، اكتشفنا أنها كلها بتستهدف الشباب ومفيش حملات موجهة نحو كبار السن، وكان نفسنا نعمل حاجه نشجعهم بيها على الاستشفاء ومعرفة الأماكن اللي في مصر، اللي محدش يعرفها هنا.
المساهمة في خطة 2030
وأضافت لـ القاهرة 24: كنا عايزين نطلع بره الصندوق، ونسلط الضوء على موضوع السياحة، بس بشكل مختلف، لأن الدكتور نسرين نادر، المشرفة على المشروع طلبت مننا نساهم في خطة 2030.
وتتابع ريهام: في مؤتمر مصر والسياحة العلاجية بشرم الشيخ عام 2017، الرئيس اتكلم فيه عن أماكن مصر السياحية الاستشفائية، وإحنا كنا متحمسين إننا نعمل حاجه جديدة ومختلفة لخدمة بلدنا، فاخترنا الموضوع ده، ونفذنا الفكرة إننا في البداية عملنا أبحاث لمدة 3 أشهر.
وأكملت: علشان نفهم جمهورنا أكتر ونتأكد فعلا إذ الأماكن دي فعلا بتعالج ولا لا، سفرنا بالفعل لكذا مكان، واتكلمنا مع أجانب وناس من أهل البلد، ودكاترة كانوا هناك بيشرفوا على حالات ليهم.
ويحلم فريق العمل بالحصول على دعم وزارتي الصحة والسياحة، وأن يكون مشروعهم جزء من المساهمة في خطة الرئيس السيسي 2030، بالإضافة إلى تحول المشروع لحملة قومية كبرى، تساعد على زيادة الدخل القومي لمصر.
