محمد صبحي: المهرجانات الشعبية زي المخدرات | فيديو
علق الفنان محمد صبحي على قرار نقيب المهن الموسيقية هاني شاكر بمنع 19 من مطربي المهرجانات، كما تحدث عن خطورة المهرجانات الشعبية على الفن المصري.
وقال محمد صبحي، خلال لقائه مع برنامج مصر جديدة عبر شاشة قناة etc: هاني شاكر راجل ملتزم بالفن بتاعه وعنده تاريخه ونقيب الموسيقيين، وأكيد هو فاهم بيعمل إيه.. يعني مثلا هل ممكن تدي تصريح لواحد يبني برج أو عمارة وهو مش مهندس؟ أو ممكن طبيب يعمل عملية جراحية وهو مش طبيب؟ زي بالظبط التمثيل أنا مقدرش أمثل إلا لما أخد تصريح من نقابة المهن التمثيلية.
وتابع محمد صبحي: أنا لو كنت نقيب الموسيقيين كنت هقول لمطربي المهرجانات تعالى قدم وانجح، ولكن أنك مش بتنجح في اختبارات النقابة دي قصة تانية، ولو هنعمم ونقول كل واحد حر يعمل اللي عايزه، كدا نعمم في كل حاجة بقى واللي عايز يبني وهو مش مهندس يبني، واللي عايز يبيع مخدرات يبيع.
وأضاف صبحي: أنا مش هقول نمنع حاجة بس نفسي يكون فيه بديل للمهرجانات لأن المصطلح ملهوش معنى، والمهرجانات زي المخدرات في الخطورة.
أزمة مطربي المهرجانات مع نقابة المهن الموسيقية
والجدير بالذكر أصدر نقيب المهن الموسيقية هاني شاكر قرارا بمنع 19 من مطربي المهرجانات الشعبية، منهم حمو بيكا، كزبرة، حسن شاكوش، ومجدي شطة، وذلك بسبب عدم قدرتهم على اجتياز اختبارات النقابة في الغناء وبالتالي عدم حصولهم على تصريح للغناء.
