أضرب نفسك بالقلم لما يجيلك اكتئاب.. أبرز تصريحات أحمد السقا مع ABtalks |فيديو
حل الفنان أحمد السقا، ضيفًا على برنامج ABtalks، الذي يقدمه الإعلامي الإماراتي أنس بو خش، على يوتيوب، للتحدث عن مشواره الفني، والصعوبات التي واجهته في حياته، بالإضافة إلى الحوادث التي تعرض لها.
حوادث تعرض لها
وقال الفنان أحمد السقا، إنه حاليًا يتمتع بصحة جيدة للغاية، متابعا: الحمد لله أني كويس ومستور، وصحتي كويسة وولادي صحتهم كويسة ومراتي كويسة وربنا حامينا يبقى تمام أوي، أنا مش بحب أعاند القدر، لو بعافر على حاجة مرة واثنين وثلاثة ومجتش مش بقاوح القدر ومبحاولش فيها تاني، بقول إن ربنا رايد أن الموضوع ده ميكلمش مثلا، أنا مكنتش بحلم باللي أنا فيه دلوقتي، ربنا أداني أكتر مما طلبت.
وأشار أحمد السقا إلى أنه تعرض للموت أكثر من مرة، مؤكدًا أن يد الله كانت معه في كل وقت: مرة وقعت من فوق كوبري بعد ما العربية اتخبطت، بس مكانتش المسافة كبيرة، وربنا نجاني، الكلام ده وأنا صغير في السن، واتعرضت لأخر حادث من سنة وكان عنيف جدًا، لدرجة أن الناس افتكرتني مت، وقالوا طلعوا المتوفى من العربية.
وأضاف أحمد السقا كاشفًا تفاصيل الحادث الأخير الذي تعرض له: أنا ساكن على طريق إسكندرية الصحراوي، والشارع واسع جدا،وكنت بسير بالسيارة بسرعة ليست عالية جدا ولا بطيئة يعني 85 ك/س، فجأة لقيت العربية اتقلبت، وراحت الناحية التانية، وبستر ربنا مكانش فيه عربيات مقابلة، وسمعت الناس بتقول خرجوا المتوفى، وكنت دايخ، وكان فيه ضابط محترم جدا جري جاب مياه، وجابوا ونش وروحوا العربية البيت، ولحد ما نمت وصحيت مكنتش مصدق أني عايش، بكل المقاييس كان لازم أكون ميت، بس ربنا ستر.
نصائح للتغلب على الاكتئاب
كما وجه السقا نصائح للجمهور للتغلب على الاكتئاب بكل أنواعه، قائلًا: بص لنفسك في المراية، وأضرب نفسك بالقلم، وقول أنا لسه عندي،ولسه هفوز على الاكتئاب، وهتغلب عليه، الاكتئاب ليه عده مراحل، وإحنا اتعودنا إن الراجل ميقولش أي، أو يعيط أو ينهار أو يشتكي أو يحتاج حضن، احنا تربينا على كده، ويتقال لينا مفيش حاجة تهزنا، لكن إحنا من لحم ودم وبنتهز.
تعامله مع الشهرة
وقال أحمد السقا إنه لا يحب أن يرى نفسه في المرآة، مؤكدًا أنه لا يتضايق من الشهرة،:الشهرة مش مضايقاني، ولو رايح مشوار في ميعادمعين بخلي فيه ساعة أسلم فيها على الناس، مينفعش أقول لحد لأ، بس الشهرة عاوزه جهد عصبي شوية، بس الناس دي هما رأس مالي،لو اتكلمت مع واحد نص دقيقة، هيروح يحكي لـ 10 من أصحابه، وكل واحد من أصحابه هيقول لـ 10 كمان.
وأشار إلى أنه إذا جاءته رسالة بها موعد وفاته سيفتحها، قائلًا: هفتحها، الموت حق، الناس تقولك بعيد الشر، بس الموت مش شر، هوالأحسن أني معرفش الموعد، بس لو قدامي هفتحها، على الأقل الواحد يعمل لآخرته شوية في الفترة الأخيرة، مؤكدًا أنه يرتدي سلسلتين بشكل دائم بهم خاتم النبوة وحصان، وموس مكتوب به أسماء أولاده.
واختتم أحمد السقا حديثه مع أنس بوخش، أن والدته مازالت تعامله كطفل يبلغ من العمر 10 سنوات، وأنه تعلم النبل والشجاعة من الفروسية.
