رامي جمال: مقدرش أنافس عمرو دياب.. وبحس أنه مش عايزني ألحن له
تحدث الفنان رامي جمال عن منظور النجاح الذي قدمه الهضبة عمرو دياب، مشيرًا إلى أنه يعتبره خارج المنافسة مع أي مطرب آخر.
وقال رامي جمال خلال حواره مع نجوم أف أم: النجاح ملهوش سقف، ولو رضيت باللي قدمته مش هتقدم حاجة أحسن، ومثلا عمرو دياب مثالنا الأعلى لينا كلنا بقاله أكتر من 35 سنة بينجح.
وواصل رامي: اللي عايز ينافس عمرو دياب لازم يكون قدامه نفس الطريق وعدد الألبومات والنجاح والسنين دي كلها، ويحكم عليها لزمن قدام، لكن أنا بتكلم على واحد عنده زملاء فنانين بدأوا معاه في نفس الوقت، بس عمرو دياب عداهم وكمل نجاح لحد دلوقتي، وأنا واثق أنه ذكي جدا وعايز يكمل كرقم 1.
وأضاف رامي: وأنا مينفعش أصنف نفسي منافس لعمرو دياب، أصل مينفعش يكون حد بنسمعه من زمان من واحنا في المدرسة وأنا لما بقيت بغني في عصره أقارن نفسي بيه.
واختتم رامي جمال، قائلا: فكرة أني ألحن لعمرو دياب حاجة بقت صعبة دلوقتي؛ لأن أنا كملحن بحب اللي قدامي يكون عايزني ألحن له، والشعور ده كان عند عمرو دياب زمان.
آخر أعمال رامي جمال
والجدير بالذكر، أن آخر أعمال رامي جمال هي أغنية بعنوان الجو جامد، ضمن ألبومه الجديد الذي يحمل اسم ولسه، والتي طرحها منذ قليل على حسابه الرسمي موقع الفيديوهات يوتيوب، والاغنية من تأليف إيهاب عبد العظيم، وألحان عمرو الشاذلي.
