شوفت عمتي مع واحد أتصرف ازاي؟.. بماذا أجاب مبروك عطية؟
رد الدكتور مبروك عطية، العميد السابق لكلية الدراسات الإسلامية جامعة الأزهر فرع سوهاج، على سؤال ورد إليه من أحد المتابعين، نصه: أنا شوفت عمتي في الشارع مع واحد وكان باين إن العلاقة فيها حاجة مشبوهة، أقول للعيلة ولا أعمل أيه؟.
موقف من حياة النبي صلى الله عليه وسلم
وأجاب مبروك عطية من خلال بث مباشر عبر حسابه الرسمي على موقع التواصل الاجتماعي فيسبوك: عيلة ايه اللي هتقولها علشان شوفت عمتك مع سباك في الشارع رايح يغيرلها الحنفية، وهى عارفاه وعارفه أمه، وبتقوله مد يا مكلوب، وأختك عملت أيه ياض لما اطلقت وأنت ولا عارف سيرة عمتك وأنت تعرف سيرة كام واحد.
وأضاف مبروك عطية: حسن الظن بالله من الإيمان والحمد لله انك شفتها في الشارع، وبعدين متأكد منين أنهم على علاقة مشبوهة، شوفتهم ماشيين في الشارع بيطوحوا..سكرانة عمتك وهو بيفوقها..ولا هو سكران وهى واخداه على صدرها!..علاقة أيه بس اللي مشبوهة؟!
وأشار العميد السابق لكلية الدراسات الإسلامية: ست كبيرة واخده كهربائي واللمبة عندها كل ما تركبها بتطفي، حسن الظن بالعمة واجب، أما لو خدت الموضوع بقى في بالك، بس كان عليك تتأسى بسيدنا محمد صلى الله عليه وسلم لما كان واقف مع زوجته صفية فمر عليه نفر من الصحابة وناداهم وقال لهم هذه صفية.
واختتم مبروك عطية: لو ناديتها وقولتلها يا عمة مين ده يا عمة..حتقولك ده المتعوس على شبابه الولد السباك ابن خالتك نبوية.
