بقلب في جيب زوجي وأخد الفكة هل حرام؟.. مبروك عطية: دي ممكن توجع روحه
رد الدكتور مبروك عطية، العميد السابق لكلية الدراسات الإسلامية جامعة الأزهر فرع سوهاج، على سؤال ورد إليه جاء فيه: بقلب في جيب زوجي وأخد الفكة واشتري بيها حاجة للعيال، فهل ده يحرم عليّ؟
رد مبروك عطية
وقال عطية من خلال بث مباشر عبر حسابه على فيسبوك، إنه يحرم مثل تلك الأشياء، لأن مال الزوج يعد أمانة، فيجب الحفاظ عليها.
تابع مبروك عطية: لما جوزك يقلع البنطلون فيه 2 جنيه ولا غيره، واجب عليكي تحفظيهم وعينك متجيش عليهم ولا تعديهم.
وأضاف العميد السابق لكلية الدراسات الإسلامية: قولي للعيال يقولوله يجيب حاجات حلوة وشكولاتة، قولي له هات للبنت حلوة حاجة حلوة، متاخديش حاجة من وراه أبدًا، ولا قرش صاغ موجود ولا جنيه.
واستطرد عطية: قال تعالى: “أَوَمَنْ يُنَشَّأُ فِي الْحِلْيَةِ وَهُوَ فِي الْخِصَامِ غَيْرُ مُبِين”، للدلالة على الأشياء الجميلة التي ينشأ فيها الأطفال.
واصل مبروك عطية: بعض الستات بتستصغر العمل بتقول دي حاجة فكة، الحاجة الفكة دي ممكن توجع روحه، يقول كان في جيبي باقي 10 جنيه راح فين؟ وممكن يسألك عليها، فتقولي أيوه أخدها فيرد عليكي، هو أنا اتأخرت، تاخديها ليه، يا تقولي مخدتهاش فتجيبيله شاغل في دماغه، وسواس، اتعلموا، غيروا الفيس، الدين النصيحة.
وأشار مبروك عطية: أما لو استأذنتيه، ساعات يا أخويا لما بتقلع البنطلون بلاقي 2 جنيه باخدهم أجيب بيهم شكولاتة لحماده، قال ماشي فمفيش مشكلة بعد الاستئذان.. لو قال لأ وخايف على الجنيه يبقى مينفعش، وشرع القضاء لتخليص الحقوق، وفض النزاعات.
