أسهل وأصعب مادة.. أمهات مصر يحكين تجاربهن مع الأبناء في المراحل التعليمية
نشرت عبير أحمد، مؤسس ائتلاف اولياء أمور المدارس الخاصة، منشورًا على صفحة الائتلاف، تضمن: ايه أكتر مادة معصلجة معاكم حسب كل سنة ومرحلة دراسية؟، والعكس ايه أسهل مادة؟ احكولنا تجاربكم علشان نفيد بعض.
رأي أولياء الأمور
وتفاعل كثير من أولياء الأمور من الأمهات على صفحة الاتحاد في فيس بوك، حيث قالت ولي أمر: الرياضة والدراسات والإنجليزي منهج سنة رابعة طويل جدا جدا، ورياضة أولى إعدادي طويلة شوية لكن باقي مواد أولى إعدادي كويسة نوعا ما بالنسبة لسنة رابعة.
وقالت ولية أمر: الساينس والماث وIct فى رابعة إبتدائي طويلة وكتيرة ومش هنقدر نخلصها ابدا وللأسف مفيش وقت للتدريب على حل الأسئلة، احنا داخلين الامتحان ومش ضامنين النجاح بس لا يكلف الله نفسا إلا وسعها مش هاجى على بنتى دى طفلة صغيرة.
وذكرت أخرى: "علوم ودراسات تانية إعدادي منهج طويل وتقيل جدا غير الكمبيوتر والتربية الفنية.
وكشفت ثالثة: الدراسات مش صعبه بس حشو كتير أوي سادسه ابتدائي.
وأجابت ولية أمر: قصة العربى فى جميع المراحل الدراسية ملهاش لازمة لأنها بالفعل تم تدريسها فى مادة التاريخ.
وتابعت أخرى: بصراحه المواد التى لا تضاف للمجموع بالأخص الرسم والكمبيوتر محدش بيستفاد منهم يبقى ليه نعطل نفسنا بيهم، الدين كويس بنستفاد منه.
وقالت ولي أمر: أولى ثانوي مش عارفين يحلوا ازاي علي التابلت ولا اتدربوا.
وذكرت أخرى: أن المناهج طويلة جدا ولعب الرياضة أو الهوايات عموما اللي كل الدول بتشجعها أولادنا حتهملها، انا مدرسة ابني لغت حصص الموسيقي والرسم لتكملة منهج رابعة وطبعا نفسية الأولاد تعبت جدا مينفعش الوضع يستمر كدة.
وردت إحداهن: توزيع المناهج على العام الدراسى مش مظبوط، يعنى دايما أصعب وحدة فى الساينس بتكون آخر وحدة فى الترم، مش بيكون فى وقت مناسب لشرحها ومذاكرتها والمراجعة عليها، الماث كتير جدا، الدراسات حشو كتير قوى.
