آدم الشرقاوي عن مسلسل لعبة نيوتن: مشهد الباب مع فراج كان حقيقي..ووالدتي تعشق منى زكي
تحدث الفنان أدم الشرقاوي عن كواليس مشاركته في مسلسل لعبة نيوتن مع منى زكي، وكشف آدم عن أصعب مشهد في المسلسل.
وقال آدم الشرقاوي، خلال لقائه مع الفنانة إسعاد يونس في برنامجها صاحبة السعادة: أنا جاتلي فرصة مسلسل لعبة نيوتن بالصدفة، لأنهم كانوا عايزين حد بيتكلم أنجليزي كويس وعربي مكسر عشان الدور، وكنت متوتر أوي، بس هما كانوا متعاونين معايا جدا وفهموني كل حاجة وعملت تجارب أداء وأستاذ تامر محسن شافني، وقالي تعالى مصرعشان نبدأ، والدور كان المفروض صغير أوي بس لقيت الموضوع كبر.
وأضاف آدم: أنا كنت عارف منى زكي، وشوفتها في فيلم صعيدي في الجامعة الأمريكية وماما بتحبها أوي ولما قولتلها كانت فرحانة جدا ومش مصدقة لأنها بتعشقها، ومكنتش عارف بقيت الممثلين وبعد كدا ذاكرت وعرفتهم.
وتابع أدم الشرقاوي: وأصعب مشهد هو مشهد الباب أنا مع فراج وعملنا المشهد دا كتير عشان لازم ناخده من كذا زاوية، وكان لازم أقاوم فراج وأمنعه من الدخول، وهو كان عايز يدخل بالعافية، وكنا بنزق بجد، وأنا عرقت وتعبت فعلا، وكمان أول مشهد في العربية مع منى زكي كان صعب شوية لأن العربي بتاعي كان ضايع.
مسلسل لعبة نيوتن
وفي سياق متصل، مسلسل لعبة نيوتن من إخراج وتأليف تامر محسن، وشارك في المسلسل العديد من الفنانين، منهم منى زكي، محمد فراج، محمد ممدوح، عائشة بن أحمد، سيد رجب، ومايان السيد.
