يحيى الفخراني عن بداية قصة حبه مع لميس جابر: الموضوع بدأ من زرار الجاكيت
استعاد يحيى الفخراني ولميس جابر ذكريات تعارفهما في البداية، وقصة حبهما في فترة الدراسة بالجامعة، والكثير من الذكريات، خلال حلولها ضيفين على برنامج صاحبة السعادة تقديم إسعاد يونس.
وقالت لميس جابر لـ إسعاد يونس: أنتي فاكرة أكيد أني أنا وأنتي كنا أصحاب ونعرف بعض قبل ما أعرف يحيى الفخراني، وكنت أنا وقتها في كلية طب وأنت في الثانوية.
وأضافت لميس جابر: مرة كنا في الجامعة ورأينا إعلان لمسرحية ستعرض من بطولة فرقة طب عين شمس المسرحية على الهوسابير بعنوان الناس في السما التامنة، واتفقنا روحنا رايحين نتفرج على الـ رواية، وقتها شوفت الفخراني وكان بطل العرض وشبه عليا وعزمنا أنا وأنتي على المسرحية ودفع 10 صاغ بحالهم.
وتابعت لميس جابر: وقعدت أنا وإسعاد يونس وشوفنا الفصل الأول وروحنا لأن الوقت تأخر، ووعدنا مرة ثانية مع والدتي لنشاهد الرواية.
وتدخل هنا يحيى الفخراني ضاحكا: دفعت الـ10 صاغ لأني كنت برسم عليها مش هدفع لأي حد جه أنا.
قصة حب يحيى الفخراني ولميس جابر
واستكملت لميس جابر: كنا في سنة تانية وحصلت مشكلة بين يحيى الفخراني وصديقة لنا تدعى ليلى ووالدها كان أستاذ، ولاقيت يحيى الفخراني بيتخانق بشدة وقالها أنتي علشان والدك أستاذ تعملي ده، ووقتها زعلت منه وأخدت موقف.
وفي يوم في الجامعة عملت نفسي مش شايفاه، واستوقفني وقالي أنتي زعلانة، وشرح لي الموقف، وقولت له معلش دي بنت برضه وصاحبتي ومكنش ينفع تعمل معاها كدة قصاد الناس.
وأضافت لميس جابر: في سنة تالتة لاقيت دكتور محمد الأخرس بينده لي وبيقول لي تعالي هتمثلي في مسرحية لـ برنارد شو، وبالفعل شاركت في المسرحية اللي كان البطل فيها يحيى الفخراني.
واستكمل يحيى الفخراني قصة تعارفها وبداية قصة الحب بينهما، قائلا: حصل أن فيه حط غلط في المسرحية واتنرفزت ورفضت الخروج لتحية الجمهور، لكنها أقنتعنني بأن الناس ملهاش ذنب.. وعملت لمسة انثوية وراحت ربطت زراير الجاكت لأني كنت هقلع لبس الشخصية وامشي.
وأضاف يحيى الفخراني ضاحكا: هي دي الحيلة اللي دفعت تمنها 40 سنة، يقصد عمر زيجتهما حتى الآن.
وقال يحيى الفخراني: بعدها بقينا أصحاب ونشأت قصة الحب بيننا، ثم سافرت في رحلة للخارج وبعت لها جواب كنت مفتقدها، والحب الحقيقي بيكون الواحد مش عارف ده حب ولا صحوبية، لكن الواحد بيحس بالارتياح لما يقعد مع الشخص اللي بيحبه.. ساعتها ده الحب الحقيقي.
