لطفي لبيب: تقديمي 140 فيلمًا خلال فترة وجيزة سبب إصابتي بالجلطة| فيديو
تحدث الفنان لطفي لبيب عن فترة مرضه وإصابته بالجلطة، مشيرًا إلى أن تكثيفه للأعمال وإجهاده هو السبب الذي أدى لإصابته بالجلطة.
وقال لطفي لبيب خلال حواره مع القاهرة 24: أنا مثلت كل حاجة تقريبًا وأخشى إني كنت تقيل أوي على الناس وليا تقريبًا 400 عمل منهم 140 فيلم وفي فترة وجيزة ده اللي يمكن عملي إرهاق وجاتلي جلطة من خلال ده.
وأضاف: أنا مش زعلان من حد خالص، والناس جاتلي المستشفى، زمايلي وأصدقائي، واللي مجاش كلمني في التليفون، وأنا راضي جدًا؛ لأني حاليًا عندي وقت أشوف الناس، وأقعد مع أولادي، وأشوف بيتي، ومكنش عندي وقت قبل كده خالص.
وتابع لطفي لبيب: الحمد لله، دلوقتي أنا كويس وبخير، واللي سأل واللي مسألش مش زعلان من حد، فاللي مسألش عليا؛ أكيد مشغول وعنده حاجات.. واللي سأل عليا؛ يُشكر، وكل الفنانين تقريبًا بيسألوا عليا وبانتظام، أو بيجولي مكتبي.
آخر أعمال لطفي لبيب
وشارك لطفي لبيب في حكاية ويبقى الأثر، وهي إحدى حكايات الجزء الثاني من مسلسل إلا أنا، وجسد خلاله دور رجل يدعى عادل، متزوج من الفنانة ميريت الحريري، وهو جار الفنانة نجلاء بدر، ودائم السؤال عنها وأسرتها، وذلك خلال أحداث الحكاية.
وضمت حكاية ويبقى الأثر، العديد من الفنانين، منهم: نجلاء بدر وإيناس كامل وكريم كوجاك ومصطفى دوريش ومحمد التاجي وميريت الحريري ولطفي لبيب وإلهام عبد البديع، والحكاية سيناريو وحوار أماني التونسي وإخراج أحمد يسري.
