كبرت نفسي بالمكياج.. يحيى الفخراني يكشف كواليس أرض الأحلام مع فاتن حمامة
كشف الفنان القدير يحيى الفخراني كواليس فيلم أرض الأحلام مع الفنانة فاتن حمامة، مشيرا إلى أنه كبر شكله بالمكياج ليتناسب مع سن فاتن حمامة.
وقال يحيى الفخراني عن خلال لقائه إسعاد يونس في برنامجها صاحبة السعادة عبر شاشة DMC: فاتن حمامة هي اللي اخترتني للدور في فيلم أرض الأحلام، وكنت ساعتها مقرر أني مش هعمل أفلام تاني لأني كنت لسه طالع من تجربة وحشة وكنت متعقد ومتضايق ساعتها.
وواصل: بس لما عرفت أن فاتن حمامة هي اللي عايزايني وكلمتني وقالتلي متمسكة بيك عشان أنا عايزة أعمل دور حلو وشايفة أنك عنصر مهم في الفيلم، وكانت تجربة حلوة فعلا وأول يوم تصوير روحت بدري وقالولي فاتن حمامة عايزة تشوفك.
وأضاف يحيى الفخراني: ودي كانت أول مرة أشوفها على الحقيقة ولاحظت فرق السن بيننا، وكنت مقرر أني مش هحط مكياج، بس حسيت إني لازم أعمل مكياج لأن أول مشهد كنت بعاكسها، ومش ممكن فرق السن دا وأعمل كدا، الدور مش هيكون لايق.
واختتم الفخراني: عشان كدا كان لازم أكبر نفسي بالمكياج، وروحت خليت شعري أبيض كأني راجل كبير، وحسيت أن فاتن حمامة بتشتغل بإحساس الهاوي لحد دلوقتي رغم كل العمر دا، والأعمال دي كلها.
فيلم أرض الأحلام
وفي سياق متصل، فيلم أرض الأحلام من إخراج داوود عبد السيد، وتأليف هاني فوزي، وشارك في الفيلم العديد من الفنانين، من بينهم هشام سليم، ومحمد التاجي.
