ويجز: مكنتش مخطط أبقى مغني وكنت بمشي بـ 20 جنيه في اليوم
تحدث مطرب الراب الشهير ويجز عن طفولته وبدايته الفنية، مشيرًا إلى أن طفولته تتسم بالقسوة، وتلك المرحلة هي التي كونت شخصيته الحالية.
وقال ويجز خلال حواره مع الإعلامي أنس بوخش في برنامج AB Talks: عندي 6 أخوات مش كلهم أشقاء وكل حد في حتة، وامبارح كان عندي حفلة والنهارد فيه هدوء في حياتي، وأنا عندي مشكلة مع الهدوء، لو هدوء كتير بيتحول عندي مشكلة ومحبوش لأني مش بتاع قعدة في البيت خالص وأحب أحتك بالناس.
طفولة ويجز
وأضاف ويجز: طفولتي كانت قاسية ومش لسبب معين، أو حاجة كانت جاية عليا ولكن في طفولتي كنت بتنقل كتير أوي بسبب ظروف شغل الوالد، وعملت مليون حاجة وعمري ما تخيلت إني هغني وبعدين جاتلي فرصة وبقيت أغني دلوقتي، ومكنش عندي خطة أبقى مغني، كنت قبل كده بحب أكتب وأسمع مزيكا واتفرج على ماتشات الكورة مع الشباب لأني مبعرفش ألعب.
وتابع ويجز: أنا عندي مبدأ أنا مش عايز حاجة، مش عايز جنيه زيادة ومش عايز أي حاجة، فاكر إن بيبقى معايا 20 أو 50 جنيها في اليوم، بس مش هقول لحد هات فلوس فهتعايش مع ظروفي، دلوقتي من أول 100 جنيه فالحمد لله.
واستكمل: ابتديت محكمش على حد، وبقيت بشوف إن البشر بيعملوا كل حاجة، وأجرب كل شيء اتطلب مني معملوش للترفيه، يعني زمان كان يتقالي متركبش موتوسكل دلوقتي بقيت بركبه.
