جوزي مشغلني خدامة في البيوت وبيقولي اعملي بلقمتك.. مبروك عطية: واسيه
رد الدكتور مبروك عطية، العميد السابق لكلية الدراسات الإسلامية جامعة الأزهر فرع سوهاج، على سؤال ورد إليه من أحدى المتابعات تقول فيه: جوزي مشغلني خدامة في البيوت، وبيقولي اعملي بلقمتك، أنا مش قادر على الصرف على البيت، وبيقول إن حضرتك رأيك إن الست تشتغل وتساعد جوزها، بس أنا مش قادرة يا شيخ والله؟
مبروك عطية: النفقة الأساسية على الزوج
وقال الدكتور مبروك عطية من خلال فيديو بثه عبر حسابه على موقع التواصل الاجتماعى يوتيوب: أنا قرأت السؤال ده وقولت قبل كدا لكن كلامي ورأيي متفهمش، أنا عمري ما قولت إن الزوجة تصرف، الزوجة تواسي..يعني واسيه..قوليله خد الحبة دي..خد التفاحة دي.
وأضاف عطية: إنما تشتغل وتصرف على البيت وتجيب كيلو إلا ربع لحمة بـ 100 جنيه وتجيب كيلو كوارع بـ 150 جنيه دلوقتي، يبقى لأ..ولأ يعني لأ.
تابع العميد السابق لكلية الدراسات الإسلامية: النفقة الأساسية على الزوج، لكن الزوجة تواسي، ومواساة الزوجة ليست واجبًا، يعني إذا واست فـ أهلا وسهلا، لا تواسي يبقى إن شالله ما عنها واست.
واختتم الدكتور مبروك عطية: يا جماعة ألف باء في الدين إن النفقة على الرجل وبس..النفقة على الرجل، مستدلًا بقوله تعالى: “لِيُنفِقْ ذُو سَعَةٍ مِّن سَعَتِهِ ۖ وَمَن قُدِرَ عَلَيْهِ رِزْقُهُ فَلْيُنفِقْ مِمَّا آتَاهُ اللَّهُ ۚ لَا يُكَلِّفُ اللَّهُ نَفْسًا إِلَّا مَا آتَاهَا ۚ سَيَجْعَلُ اللَّهُ بَعْدَ عُسْرٍ يُسْرًا”.
