حرامي السينابون يثير غضب رواد السوشيال ميديا.. ومعلقون: ناس معندهاش ضمير | صور
انتشر في الساعات القليلة الماضية على مواقع التواصل الاجتماعي، منشورا لسيدة تتهم سائق سيارة تابع لأحد تطبيقات التوصيل بسرقة حلوى “السينابون”، والتي أرسلتها صديقتها إليها بواسطة السائق.
وكتبت الضحية عبر حسابها بموقع التواصل الاجتماعي “فيسبوك”، متهمة السائق بسرقتها: “صاحبتي كانت عاوزة تبعتلي شوية حاجات مهمة وعملتلي سينابون، وقالت تبعتلي الحاجات دي مع واحد من تطبيقات التوصيل الشهيرة، ومن كرمها حاسبته واديتله فلوس زيادة كمان، بنتصل بيه بعدها يقوم يكنسل كذا مرة وبعدها يلغي الرحلة ويعملنا بلوك على الفون وعلى الواتس، وبيرد على الأرقام الغريبة ولما يعرف إن إحنا يقفل ويعمل بلوك، هو غالبًا كان جعان فطمع في السينابون، طب ألف هنا بس هات باقي الحاجات، بعيدا عن أي حاجة وإن صاحبتي على نياتها بس ده انعدام ضمير وشخص معندوش أمانة، اللي يطمع في حاجة حتى لو بسيطة يسرق وينهب ويخطف”.
وقامت الضحية بعد وقت قصير بتعديل المنشور، مضيفة: بعتلنا دلوقي فويسات فيها شتايم وتهديد، أنا نزلت الرحلة ورقمه عشان تخلوا بالكم من الأشكال دي، وعشان الأبلكيشن ده مش أمان نهائي، حرامي السينابون، يسري سينابون.
ولاقى المنشور تعليقات وردود أفعال كبيرة من رواد موقع التواصل الاجتماعي “فيس بوك”، منها المتعاطف مع الضحية، ومنها المتفاعل من أجل التندر والمزاح.
ردود أفعال السوشيال ميديا
وكتبت إحدى المعلقات: “حسبي الله ونعم الوكيل ناس معندهاش ضمير ابلكيشن *****، واستكملت ضاحكة: جاري البحث عن سينابون شوشو وصاحبتها”.
وعلقت أخرى: “لا البوست مش مضحك ودي مش أول مرة تحصل في الابلكيشن ده، بيشغلوا حرامية واللي خلاه يطمع في حاجة بسيطة، ممكن يسرق الكبيرة، كويس إنها ما بعتتش معاه شنطة ولا أي حاجة مهمة”.
وكتب ثالث: “والله العظيم كنت شغال تبع نفس التطبيق، واحدة كانت باعتة معايا ف العربية شنطة فلوس لصاحبتها وقالتلي إنها فلوس والحمدلله وصلتها، وقولتلها إوعي تعملي كده مع أي حد تاني الحمد لله على تربية الشبع والعين المليانة”.
وشاركت أخرى: “حسبي الله، والله حتى لو مبعوت ورقه فاضية، فعليا فين أمانتي!، أنا واخد فلوس عشان أوصل الورقة الفاضية دي! لا إله إلا الله.. يارب الناس دي يكون ليهم قرايب في الفيس ويتكسف قدامهم ما دام لم يخجل من ربنا”.
يسري سينابون
وعلق أحد المتابعين ساخرا: “اتصلت بيه بقوله أستاذ سينابون معايا قفل”.
وأضاف آخر: “اللي ضحكني مش إنه سرق السينابون، اللي ضحكني إنك تتخيل ترن على رقمه فتلاقيه ظاهر علي التروكولر يسري سينابون”.
