عصفورة وبتنقل أخبار.. ننشر أقوال المتهم بصفع سيدة الوراق في الشارع │ خاص
أثارت واقعة صفع سيدة، عدة مرات وإهانتها وسبها بألفاظ خارجة أمام أطفالها وسط الشارع في منطقة الوراق غضب المواطنين، خاصة بعد تداول فيديو يرصد لحظة الاعتداء.
وعقب الحكم بسجن المتهم 5 سنوات، وغرامة 20 ألف جنيه، حددت محكمة شمال الجيزة مطلع فبراير المقبل، لنظر جلسة الاستئناف على الحكم.
وينشر القاهرة 24 نص التحقيقات مع المتهم في قضية سيدة الوراق، والتي أكد فيها أن فيديو الاعتداء عبارة عن تمثيلية، اتفق عليها مع المجني عليها من أجل عودة زوجته إليه مرة أخرى.
وقال المتهم في التحقيقات: اللي حصل إني متزوج أخت المجني عليها مها محمد مصطفي من سنة 2014، وكان في خلافات أسرية طوال السنين دي، وطلقتها في 2018 ورجعتها في 2020 وطوال فترة جوازي كنت بتعامل مع أخت مراتي منار عشان تنقلي أخبار مراتي لما تغضب وتروح بيت أهلها، والكلام ده استمر من أول زواجي حتى الآن، ومراتي سابت البيت في نهاية شهر أكتوبر 2021 وطوال فترة عدم وجودها كنت بعرف أخبارها من منار.
تفاصيل قضية سيدة الوراق
وتابع المتهم: يوم 14 ديسمبر 2021 کلمتني منار وقالت لي انت فين؟، قلت لها أنا في المحل التموين بتاعي، فجاتلي ومعاها بناتها التلاتة، وحاسبت على توك توك اللي جايين بيه وقعدوا معايا شويه وعيالها كانوا بيلعبوا في محل السايبر بتاعي اللي جنب محل التموين بتاعي، وهي اقترحت عليا إني عشان ارجع مراتي وابني، إننا نعمل فيديو وأنا اقوم بالتعدي عليها وضربها.
وأضاف المتهم في اعترافاته: أنا بعد ما أصوره ابعته لمراتي وأهددها بيه عشان ترضى ترجع البيت هي وابني، وفعلا صورت الفيديو وأنا بضربها وبعت الفيديو لمراتي على ماسنجر فيس بوك، وبعدين هي كلمت أختها وهي قاعدة معايا وشتمتها عشان جات لي، وبعدين قعدنا أنا ومنار وعيالها وجبنا فطار وعيالها وعيالي قعدوا يلعبوا مع بعض.
أكمل المتهم: جبت لها بقالة من محل جنبي، وادتلها ألف جنيه وكملنا قعدة ووقفتلها توك توك وحاسبت عليه ومشيت، وبعدها فضل في تواصل بيني وبينها لحد ما لقيت الفيديو اتنشر، وواحد بيكلمني على نشر الفيديو على المواقع وهو ده كل اللي حصل.
